Bas prokýratýr Kostenko atyndaǵy shahtadaǵy 46 kenshiniń ólimine jáne 28 adamnyń jaraqat alýyna sebep bolǵan apatqa baılanysty qylmystyq isti tergeý aıaqtalǵanyn habarlady.
Bul týraly bas prokýror Berik Asylov jazdy, dep habarlaıdy aqshamnews.kz.
- Bas prokýratýranyń arnaıy prokýrorlarynyń basshylyǵymen VJTT Kostenko shahtasyndaǵy 46 kenshiniń qazasyna qatysty qylmystyq isti tergeýdi aıaqtady. 10 aıyptalýshyǵa qatysty is taý-ken jumystarynyń qaýipsizdik erejelerin buzý (QK 277-babynyń 3-bóligi) boıynsha sotqa joldandy, deıdi bas prokýror.
KÚDİKTİLERDİŃ ESİMİ
Eske salaıyq, buǵan deıin bas prokýratýra kúdiktilerdiń esimin jarıalaǵan bolatyn.
Apat 2023 jyldyń qazan aıynda bolǵan edi. Alǵashqy jarylys K2 qabatynan bólingen metannyń janýy nátıjesinde bolǵan. Gaz mehanıkalyq ushqynnan tutanyp, metan qospasynyń jumys istemeıtin aımaqta jarylýyna jáne shahta týnnelderindegi kómir shańynyń birneshe ret jarylýyna ákelgen.
"Jarylys taralý uzyndyǵy shamamen 6 km qurady", – dep habarlady.
Tergeý barysynda jumys uıymdastyrýda tómendegideı kemshilikter anyqtalǵan:
- №6 ýchaskeniń ınjenerlik-tehnıkalyq qyzmetkerleri men Kostenko atyndaǵy shahta basshylary tarapynan qaýipti óndiristik faktorlardy tıisti deńgeıde baqylamaý;
- 2023 jyldyń qyrkúıeginde 48k3-batys lavasynda bolǵan oqıǵalardy tıisti dárejede teksermeý;
- Shańdy-jarylysqa qarsy is-sharalardy tıisti deńgeıde oryndamaý, nátıjesinde jer asty jumystary kezinde shań men gazdyń artýy, apat qaýpin joǵarylatty.
Tergeý nátıjesinde 10 kúdikti anyqtalyp, olardyń toǵyzy qamaýǵa alyndy. Olardyń qatarynda:
- Sergeı Mýstıvko – shahta dırektory, shahtadaǵy taý-ken jumystaryn apatsyz jaǵdaıda ustaýǵa, óndiristik jáne órt qaýipsizdigi erejelerin saqtaýǵa, jabdyqtardy ýaqtyly jóndeýge jaýapty;
- Nıkolaı Groznov – shahtanyń bas ınjeneri, óndiristik qaýipsizdik jaǵdaıyn baqylaý, shahtanyń gaz, shań jarylǵyshtyq jáne ken qabatynyń kenetten laqtyrý qaýpin anyqtaý mindetterine jaýapty;
- Vadım Erómın – óndiris boıynsha dırektordyń orynbasary, qaýipsiz jumys jaǵdaıyn jáne shahta jabdyqtarynyń senimdiligin qamtamasyz etýge jaýapty;
- Dmıtrıı Fedorenko – tehnıka qaýipsizdigi boıynsha bas ınjenerdiń orynbasary, shahtadaǵy tehnıka qaýipsizdigin qamtamasyz etýge jaýapty;
- Vladımır Shıshkanov – jeldetý jáne tehnıka qaýipsizdigi ýchaskesiniń bastyǵy, shahtadaǵy jeldetý jáne gaz rejımin qamtamasyz etýge jaýapty;
- Vıtalıı Pestrák – jeldetý jáne tehnıka qaýipsizdigi ýchaskesiniń shań-jarylysqa qarsy qorǵaý jónindegi kómekshisi;
- Vıktor Koptenkov – №6 ýchaskeniń bastyǵy, jeldetý, shań-gaz rejımi jáne órtke qarsy sharalardy qamtamasyz etýge jaýapty;
- T. Gabdýshev – konveıerlik kólik ýchaskesiniń bastyǵy, shań-jarylysqa qarsy sharalardy oryndaýǵa mindetti;
- Vladımır Gonnochenko – óndiris boıynsha bas ınjenerdiń orynbasary, óndiristiń ınjenerlik qamtamasyz etilýin baqylaýǵa jaýapty;
- Dmıtrıı Kosar – shahtanyń bas mehanıgi, shahta jabdyqtarynda qaýipsiz jumys júrgizýdi qamtamasyz etpegeni úshin kúdikti dep tanylǵan.
Apattan 74 adam, sonyń ishinde qaza tapqandar men tiri qalǵan kenshilerdiń jaqyn týystary zardap shegýshi retinde tanyldy.