Buryn bul qyzmetterdi İshki ister mınıstrligi atqaryp kelgen.
Kóshi-qon salasyndaǵy 20 fýnksıa İshki ister mınıstrliginen Eńbek jáne áleýmettik qorǵaý mınıstrligine berildi, dep habarlaıdy Almaty-akshamy.kz
Bul týraly málimdegen QR İshki ister mınıstrliginiń baspasóz qyzmetiniń aqparatyna sáıkes, osy fýnksıalardyń arasynda eńbek ımıgranttaryna ruqsat berý, bosqyndarmen jumys, halyqtyń kóshi-qony salasyndaǵy vedomstvoaralyq úılestirý jumystaryn júzege asyrý, kóshi-qon prosesteriniń monıtorıńi sıaqty quqyqtyq tártipti qamtamasyz etýmen tikeleı baılanysy joq ókilettikter bar.
«2022 jylǵy qańtardan bastap QR Prezıdenti Jarlyǵymen kóshi-qon salasyndaǵy 20 fýnksıa İshki ister mınıstrliginen Eńbek jáne halyqty áleýmettik qorǵaý mınıstrligine berildi. Ol úshin Eńbek kodeksine, «Bosqyndar týraly», «Halyqtyń kóshi-qony týraly», «Jeke basty kýálandyratyn qujattar týraly» jáne «İshki ister organdary týraly» zańdarǵa ózgerister engizildi», - delingen mınıstrliktiń baspasóz qyzmeti taratqan aqparatta.
Degenmen, bosqyndar men eńbek mıgranttarynyń Qazaqstanda bolý erejelerin saqtaý jaǵdaıy burynǵysynsha polısıa baqylaýynda bolady. Iaǵnı, bosqyn mártebesin jáne jeke tulǵadan eńbek qyzmetine ruqsat alǵannan keıin, kórsetiletin qyzmetti alýshylar ornalasqan jeri boıynsha polısıaǵa ýaqytsha turýǵa ruqsat alýy kerek.
«Eńbek jáne halyqty áleýmettik qorǵaý mınıstrliginiń bosqyndarmen jumysy kóbine olarǵa áleýmettik kómek, medısınalyq qyzmet jáne bilim berýge, sondaı-aq olardy jumysqa ornalastyrýǵa baǵyttalatyn bolady. «Eńbek patentteriniń» nemese jeke tulǵalardyń úı sharýashylyǵynda jumys isteýge keletin eńbek mıgranttaryna ruqsat Halyqqa qyzmet kórsetý ortalyqtary arqyly beriledi. Ruqsattardyń basqa túrlerin jergilikti atqarýshy organdar beredi. Olardy berý tártibin Eńbek jáne halyqty áleýmettik qorǵaý mınıstrligi aıqyndaıdy», - delingen resmı túsindirmede.
Týyndaǵan suraqtar boıynsha Eńbek jáne halyqty áleýmettik qorǵaý mınıstrliginiń Eńbek, áleýmettik qorǵaý jáne kóshi-qon komıtetine telefon arqyly habarlasýǵa bolady: 8/717/2-74-37-78, 74-37-26 QR İİM Kóshi-qon qyzmeti komıteti telefondary: 8/717/2-71-40-73,72-20-62.