Bıyl on jyldyq mereıtoıy ótip jatqan AQSH-taǵy Annapolis kıno festıvalinde álemniń túkpir-túkpirinen ár janrdaǵy fılmder baq synady.
Sonyń ishinde bizdiń otandasymyz, jas rejıser Samǵar Raqymulynyń «Kóshe aqyny» atty qysqametrajdy fılmi «Eń úzdik qysqametrajdy fılm» nomınasıasyn jeńip aldy, dep habarlaıdy Almaty-akshamy.kz
Atalǵan týyndy Ulttyq kınony qoldaý ortalyǵynyń qoldaýymen, Sh.Aımanov atyndaǵy Qazaqfılm kınostýdıasynyń qatysýymen túsirilgen bolatyn.
Aıtalyq, Samǵardyń bul týyndysynda aıtysker áke men reper ulynyń arasyndaǵy ózara tartys, eski men jańanyń qarama-qaıshylyǵy kórinis tabady.
Rejıser bul fılmi týraly «Kóshe aqyny» ózimniń ishki qaıshylyqtarymnyń týyndysy dep bilemin» degen pikirin aıtty.
Samǵar Raqymulynyń «Kóshe aqyny» osyǵan deıin «Turkey Internatioanl Amity Short Film Festival» baıqaýynda júldeli bolǵan. Bul ret Amerıkada top jarǵan qazaq fılminiń kórermeni kóp bolǵaı dep tileımiz.