Kamchatka bıligi 25 qyrkúıekten bastap búkil aımaqty ınternetten tolyq ajyratatynyn málimdedi, - dep habarlaıdy Aqshamnews.kz tilshisi.
Resmı sebep – "Rostelekomnyń" sýasty talshyqty-optıkalyq jelini jóndeýi. Jumys 48 saǵatqa josparlanǵanymen, aýa raıyna baılanysty 29 qyrkúıekke deıin sozylýy múmkin.
Tek negizgi nysandar – bankter, dúkender, jedel qyzmetter – ýaqytsha spýtnık baılanysqa kóshedi. Bılik turǵyndar azyq-túliksiz qalmaıtynyn málimdedi. Osylaısha Kamchatka – Reseıde ınternetten tolyq ajyratylatyn alǵashqy aımaq bolmaq.
The Moscow Times dereginshe, Reseıde mamyrdan beri ınternet shekteý jıilep ketken: mamyrda – 69, maýsymda – 662, shildede – 2 099, tamyzda – 2 129 ret tirkelgen. Qyrkúıekte de kún saıyn 60-70 aımaqta mobıldi ınternet shektelip jatyr.
Reseıdiń sıfrlyq damý mınıstrligi "aq tizim" engizdi: Iandeks, bankter, marketpleıster, reseılik áleýjeliler men memlekettik saıttar qoljetimdi bolady. Biraq tizim apta saıyn ózgerip otyrady.
Halyq qolma-qol aqsha aınalymyna oralýǵa májbúr. Taksı, jetkizý qyzmetteri, onlaın tólemder istemeı, adamdar Wi-Fi izdep sendelip júr. Tipti keı jerlerde SMS-habarlamalardyń kólemi rekord jańartqan.
Sarapshylar muny qaýipsizdik syltaýymen jasalǵan josparly shara dep sanaıdy. Al keı depýtattar tipti ınternetti demalys kúnderi turaqty túrde óshirýdi usyndy.