Almaty óziniń týǵan kúnin erekshe túrde atap ótti: túrli is-sharalar men merekelik kóńil-kúıden bólek, qala – jańa turǵyndarmen tolyǵyp, úlken syılyqqa ıe boldy.
21 qyrkúıekte Almatynyń perzenthanalarynda 69 sábı dúnıege keldi, onyń 32-si ul bala jáne 37-si qyz bara.
Ondaǵan otbasylardyń shańyraǵynda bul kún erekshe mańyzǵa ıe bolyp, eki dúrkin merekemen atalyp ótti: birinshisi – súıikti qalanyń týǵan kúni, ekinshisi –balalarynyń ómirge kelýi.
«Endi bul mereke bizdiń otbasymyz úshin – eń mańyzdy data bolmaq. Qyzymyzdyń týǵan kúnin almatylyqtardyń barlyǵymen birge atap ótetin bolamyz», - deıdi jas ana.
Qalanyń qoǵamdyq densaýlyq saqtaý basqarmasy ómirge kelgen barlyq sábıler men olardyń analary qazir ózderin jaqsy sezinip otyrǵanyn habarlady.
Qala kúni qarsańynda Qalalyq perınataldyq ortalyqta sırek kezdesetin jáne qýanyshty oqıǵa oryn aldy –dúnıege úshem keldi.
Salmaǵy 1968 gram jáne boıy 42 sm ul, salmaǵy 1648 gram jáne boıy 40 sm qyz, salmaǵy 1699 gram jáne boıy 41 sm bolatyn taǵy bir qyz ómirge keldi. Otbasy «Ańsaǵan sábı» EKU memlekettik qoldaý baǵdarlamasyna júgingen.
Medısınalyq kórsetkishter boıynsha bosaný 32-shi aptada shuǵyl túrde júrgizildi. Sábılerdiń anasy 30 jasta.
Ota erte tańda, saǵat tórtte bolǵanyna qaramastan, perınataldyq ortalyqtyń bilikti mamandar toby jedel jumyldyryldy. Dárigerlerdiń úılesimdi jumysynyń arqasynda kesir tiligi sátti ótti. Sábıler birden jańa týǵan nárestelerdiń jansaqtaý bóliminde kómek aldy, sodan keıin patologıa bólimine aýystyryldy.
Qala kúnine 69 sábı men merekeniń qarsy aldynda úshemniń dúnıege kelýi –otbasylar úshin qýanyshty oqıǵa ǵana emes. Bul Almaty – bolashaqtyń qalasy ekenin eske salady. Árbir jańa bala – jańa úmit, al balalardyń barlyǵy birge – bul qala tarıhyn quratyn jáne jalǵastyratyn bolashaq urpaq.