Almatyda Ortalyq qalalyq klınıkalyq aýrýhananyń dárigerleri medısınadaǵy eń qaýipti jaǵdaılardyń biri — qursaq aortasynyń anevrızmasy jarylǵan naýqastyń ómirin saqtap qaldy.
Pasıent qabyldaý bólimine aýyr jaǵdaıda jetkizildi. Ony bel men ish aımaǵyndaǵy qatty aýyrsynýlar mazalap, álsizdik pen óńiniń bozarýy baıqaldy.
Profesor Serik Tursynbaev pen qan tamyr hırýrgıasy bóliminiń meńgerýshisi Rahman Saparbaevtyń birlesken tekserýiniń nátıjesinde birden dıagnoz qoıyldy: qursaq aortasynyń anevrızmasy jarylýy.
Bul jaǵdaı kóbine qaıǵyly aıaqtalady. Medısınalyq statısıkaǵa sáıkes, mundaı naýqastardyń 90%-y aýrýhanaǵa jetpeı kóz jumady, al jedel operasıa jasalǵandardyń tek 10–20%-y ǵana aman qalady.
Sanaýly mınýttar ishinde anestezıologtar Igor Kımniń jetekshiligimen naýqasty operasıaǵa daıyndady. Keıin qan tamyr hırýrgtarynyń brıgadasy asa kúrdeli operasıa — anevrızmany rezeksıalaý jáne aortany protezdeýdi sátti júzege asyrdy.
Araǵa eki kún salyp naýqastyń jaǵdaıy turaqtalyp, ol jansaqtaý bóliminen jalpy palataǵa aýystyryldy. Búginde ol ózdiginen qozǵalyp, úıine shyǵarýǵa daıyndalýda.
Dárigerlerdiń aıtýynsha, bul jaǵdaı — sırek kezdesetin sáttilik.
Anevrızmanyń aldyn alýdyń eń tıimdi joly — ony der kezinde anyqtaý.
65 jastan asqan er adamdarǵa, ásirese temeki shegetinderge, aýrý qaýpin joqqa shyǵarý úshin qursaq qýysynyń ÝDZ-in bir ret ótkizý jetkilikti.
Sondaı-aq temekiden bas tartý jáne qan qysymyn baqylaýda ustaý anevrızma damýynyń yqtımaldyǵyn aıtarlyqtaı tómendetedi. Al eger anevrızma anyqtalsa, qan tamyr hırýrgynyń turaqty baqylaýynda bolý josparly operasıa jasaýǵa múmkindik beredi. Bul — shuǵyl operasıaǵa qaraǵanda ondaǵan ese qaýipsiz.
Pasıent ózine ekinshi ómir syılaǵan kásibı sheberligi, úılesimdi is-áreketi jáne janqıarlyq eńbegi úshin Ortalyq qalalyq klınıkalyq aýrýhana ujymyna shynaıy alǵysyn bildirdi.