Koronavırýstan keıin ońaltý aýrýdyń dárejesine qaramastan, emdelgenderdiń bárine qajet.
Koronavırýstyq pnevmonıanyń ortasha jáne aýyr túrimen aýyrǵan pasıentterge keshendi ońaltý mindetti túrde qajet. Almatylyqtarǵa koronavırýs ınfeksıasynan soń densaýlyqty qalaı qalpyna keltirýge bolatyndyǵy aıtyldy, dep Almaty-akshamy.kz.
Sheteldik jáne otandyq epıdemıologtar COVID-19 ishki aǵzalarǵa áser etetinin jáne aýrý emdelgennen keıin de saqtalatynyn aıtady. Almatydaǵy №8 emhananyń bas dárigeri Farıda Aǵybaeva koronavırýs juqtyrǵan naýqastarǵa usynystar berdi.
«Stasıonardan shyqqannan keıin aýrýdyń ortasha nemese aýyr túrimen aýyrǵan naýqastardy medısınalyq baqylaý úıde emhana dárigeriniń baqylaýymen jalǵasady. Emdeýdiń jalpy jaǵdaıyna baılanysty baqylaý kezeńi jeke anyqtalady», - dedi Farıda Aǵybaeva.
Kórsetkishter boıynsha psıhologıalyq jáne respıratorlyq ońaltý ambýlatorıalyq jaǵdaıda nemese mamandandyrylǵan aýrýhanada júrgiziledi. QR Densaýlyq saqtaý mınıstrliginiń 10.02.2020 j. №98 buıryǵyna sáıkes aýyr jáne hali aýyr naýqastarǵa, qarttarǵa, semizdikke shaldyqqan naýqastarǵa, júkti áıelderge, qatar júretin patologıasy bar pasıentterdi jeke ońaltý jospary jasalady.
Farıda Aǵybaevanyń aıtýynsha, ońaltý ádisteri olardyń maqsattaryna baılanysty. Sizge tynys alý dınamıkasyn jaqsartý, mazasyzdyq pen depressıa belgilerin joıý jáne t.b. qajet bolýy múmkin. Osy maqsattarǵa baılanysty ońaltý ádisteri qoldanylady. Mysaly, naýqas emdik, tynys alý gımnastıkasymen emdeledi, naýqastyń ornalasýy – qalybynyń ózgerýi.
«Pozısıalyq em tynys alý, jeldetý, perfýzıa jáne drenaj fýnksıalaryn jaqsartý úshin qoldanylady. Sondaı-aq, tirek-qımyl apparaty men trombozdyń aldyn alýdy jaqsartady. Úshinshisi – respıratorlyq ońaltý, ol klınıkalyq kórinisterge sáıkes tynys alýdy qalpyna keltiredi, onyń ishinde drenajdyq fýnksıany jaqsartý úshin fızıoterapıalyq ádisterdi qoldanylady», - dedi klınıkanyń bas dárigeri.
Sonymen qatar, psıhologıalyq ońaltý men qoldaý qajet, ómir saltyn túzetý, teńdestirilgen tamaqtaný jáne temeki shegýden bas tartý qajet.
Eger dert aýyr ótse, onda júıke, júrek-qan tamyrlary, búırek, baýyr fýnksıalary buzylýy múmkin. Sondyqtan ár naýqastyń aǵzasyna oraı ońaltý jeke tańdalady.