Tergeý sharalary úsh aıǵa deıin sozylýy múmkin
QR Syrtqy ister mınıstriginiń ókili Ońtústik Koreıada áýejaıdan qashyp ketken eki qazaqstandyqtyń ne úshin aıyptalyp otyrǵanyn túsindirdi, dep habarlaıdy Almaty-akshamy.kz Azattyq Ruhy-na silteme jasap.
Vedomstvonyń resmı ókili Aıbek Smadıarovtyń aıtýynsha, 24 naýryzda Inchhon áýejaıynda qashyp ketken eki qazaqstandyq qazirgi kezde tergeý ızolátorynda otyr.
«Áýejaıdaǵy tólqujattyq baqylaý kezinde Tashkent qalasynan kelgen Qazaqstannyń eki azamatyna Koreıa Respýblıkasyna kirýge ruqsat berilmegen. Olar túnde qashyp shyǵyp, Ońtústik Koreıa aýmaǵyna zańsyz kirgen. 26 naýryzda olardyń bireýi ustaldy. Ekinshisi 29 naýryzda polıseıge ózi berildi. Qazirgi ýaqytta olardyń ekeýi de Inchhon qalasyndaǵy kóshi-qon ortalyǵynda tergeý ızolátorynda otyr», - dedi Aıbek Smadıarov.
Ol Ońtústik Koreıa zańnamasyna sáıkes, tergeý sharalary úsh aıǵa deıin sozylýy múmkin ekenin atap ótti. Sodan keıin is prokýratýraǵa beriledi. Tergeý qupıasyna sáıkes, Koreıa Respýblıkasynyń quzyrly organdary istiń egjeı-tegjeıin jarıalamaı otyr.
«Bizdiń aqparatymyz boıynsha, bul azamattarǵa Ońtústik Koreıa zańnamasyn úsh ret buzǵany úshin aıyp taǵylyp otyr. Birinshisi – ımıgrasıalyq baqylaý týraly zańdy buzý, elge zańsyz kirý. Ekinshisi – ımıgrasıalyq baqylaý, el aýmaǵyna zańsyz kelý týraly zańnamany buzý. Úshinshisi – áýejaı nysandary men onyń nysandaryna qatysty zańdy buzý, materıaldyq shyǵyn keltirý», - dep tolyqtyrdy SİM ókili.
Aıbek Smadıarov Qazaqstannyń Ońtústik Koreıadaǵy elshiligi jergilikti quqyq qorǵaý organdarymen jáne azamattardyń týystarymen turaqty baılanysta ekenin aıtty. Syrtqy ister mınıstrligi Ońtústik Koreıada Qazaqstan azamattarynyń jappaı jumystan bosatylǵany týraly taraǵan aqparat shyndyqqa janaspaıtynyn atap ótti.
Taqyrypqa oraı: «Anamnyń otasyna aqsha jınaımyn dep ketken edi» – Ońtústik Koreıada ustalǵan jigittiń ápkesi
«Bul oqıǵa resmı túrde jumys isteıtin Qazaqstan azamattaryna áser etken joq. Esterińizge sala keteıik, Koreıa Respýblıkasynyń aýmaǵynda eńbek qyzmeti tek arnaıy ruqsat qaǵazy men jumys berýshi rásimdeıtin arnaıy vıza bolǵan jaǵdaıda ǵana júzege asyrylýy múmkin. Jumysqa ornalasýdyń qalǵan nusqalary zańsyz sanalady», - dedi A. Smadıarov.
Eske salaıyq, 27 naýryzda QR Syrtqy ister mınıstrligi Ońtústik Koreıaǵa kirýge tyıym salynǵan eki Qazaqstan azamatynyń Inchhon halyqaralyq áýejaıynan zańsyz shyǵyp ketkenin habarlady. Keıinnen olardyń ekeýiniń de ustalǵany belgili boldy.