Elimizde qyrkúıektiń ekinshi jeksenbisinde Otbasy kúni atap ótiledi. Bıyl mereke 8 qyrkúıekke, ıaǵnı búginge tuspa-tus kelip tur.
Qaı zamanda, qaı elde bolmasyn, otbasynyń adamzat urpaǵyna yqpaly men áserin ómirdegi basqa esh nárseniń kúshimen salystyrýǵa bolmaıdy. Búgingi keıipkerimiz taǵdyryna moıymaǵan myqty áıelderdiń biri – Almatydaǵy Ulttyq ulannyń 5571 áskerı bóliminiń qujattamalyq qamtamasyz etý bólimshesiniń aǵa mamany kishi serjant Almagúl Syrymbetova.
— Men Almaty oblysy Eńbekshiqazaq aýdany Qarakemer aýylynda dúnıege keldim. Týǵan aýylymdaǵy orta mektepte 11 jyl bilim aldym. Ákem dúnıeden erte ozdy. Anam mekteptegi qyzmetin istep júrip, meni qatarymnan qaldyrmaı ósirdi, bilim alýyma múmkindik jasady. Anam mektepte 40 jyl boıy hımıa-bıologıa pánderinen sabaq bergen ardager-ustaz, qazir qurmetti demalysta. Ózimniń qolymda turady, jıenderiniń ortasynda aıaýly áje bolyp otyr, — deıdi ol.
Ol bizge áskerı salaǵa qalaı kelgenin áńgimelep berdi.
— Úıimiz 6654 áskerı bóliminiń dál qasynda edi. Áskerı kıimdegi adamdardy kúnde kórip, qyzyǵatynbyz. Áskerı qyzmetshi bolý bala kezden armanym boldy. Biraq úıdegiler onymdy quptaı qoımady. 1999 jyly Qazaq Memlekettik Basqarma akademıasynyń (qazirgi “Narhoz”) Halyqaralyq bıznes joǵary mektebin ekonomıs mamandyǵy boıynsha bitirdim. Ulttyq ulanǵa 2011 jyly keldim. 7552 áskerı bólimine memlekettik satyp alý qyzmetine aldymen qyzmetshi bolyp ornalasyp, keıinnen áskerı qyzmetke shaqyryldym. Osylaı qıyndyǵy men qyzyǵy qatar júretin áskerı qyzmettegi ómirim bastalyp ketti. Keıinnen 3650 áskerı bólimine aýystym, qazir 5571 áskerı bóliminiń qujattamalyq qamtamasyz etý bólimshesiniń aǵa mamanymyn, — deıdi Almagúl.
Onyń osynaý jaýapkershiligi úlken qyzmetke tóselip ketýine sol kezdegi áskerı bólim komandıri polkovnık Iýrıı Malıskııdiń, tyl jónindegi orynbasary polpolkovnık Evgenıı Kýkýrekınniń, keıin qarjy qyzmetinde podpolkovnık Galına Mýnnyń eńbegi zor bolǵan. Al zapastaǵy serjant Gúlbarshyn Qulynbaevaǵa degen alǵysy bólek, 2016 jyly qupıa bólimshesine aýysyp kelgeninde, osy salanyń búge-shigesine deıin túsindirip, onyń myqty maman bolyp shyǵýyna kóp úles qosty.
Almagúl Syrymbetova — kópbalaly ana. Tuńǵyshy Jasulan qazaq-túrik lıseıinde oqydy. Ana jolyn jalǵap, áskerı adam boldy. Petropavl qalasyndaǵy Ulttyq ulan Akademıasynyń túlegi. Qazir 5571 áskerı bóliminiń 1-jedel maqsattaǵy batalónynda avtomobıl vzvodynyń komandıri, aǵa leıtenant. Úlken qyzy İńkár Narhoz ýnıversıteti janyndaǵy kolejdiń 3-kýrs stýdenti. Kishi qyzy Jansaıa Qazaq Bas arhıtektýralyq-qurylys akademıasy kolejiniń 1-kýrs stýdenti. Al sútkenjesi Janseri 4 jasqa tolady, balabaqshaǵa baryp júr.
Baqytta ana kezinde ózine anasy bergen barlyq ulaǵatty osy balalaryna berip júr. Perzentterine únemi adal, qaıyrymdy, bir-birińe qamqor bolyńdar degendi aıtyp otyrady. Úıdegi aýyzbirshilikpen, jylylyqpen ósken baqytty bala túzde de tabysty bolatynyna senimdi. Sondyqtan barlyq shańyraqtaǵy bala meıirimge, mahabbatqa qanyp óssin degen tilegin de jetkizdi.