8 qazanda álem nazaryn ózine aýdarǵan tarıhı oqıǵaǵa kýá boldyq. Ǵaryshqa tuńǵysh ret ushqan qazaq qyzy retinde el esinde máńgi qalatyn Dana Qaraǵusova týraly ne belgili? Ol bul mártebege qalaı jetti? Aqshamnews.kz tilshisiniń materıalynan bilińiz.
Tekti áýlettiń týmasy
Dana Qaraǵusova 1984 jyly 21 mamyrda Almatyda dúnıege kelgen. Ol kórnekti tulǵalar áýletinen shyqqan. Anasy Gúljan Qaraǵusova - tanymal saıasatker, Senat pen Májilis depýtaty bolǵan. El arasynda ol túrli ázilge aınalǵan frazalarymen este qalǵan edi.
sýret: instagram.com/dannakar
Dananyń baýyrlary da óz salalarynda jetistikke jetken jandar. Farhad Qaraǵusov - zańger, Kaspıı qoǵamdyq ýnıversıtetinde qyzmet atqarady. Al Roman (nemese Damır) Romanov - ekonomıs, “Alúmını Kazahstana” kompanıasynyń basshysy.
Otbasydan alǵan tárbıesi men eńbekqorlyǵy Dananyń ómir jolynda sheshýshi ról atqardy. Ol erte jastan óz eńbegimen tabys tabýǵa talpyndy. Bul minez keıin úlken jetistikterge bastady.
Sheteldegi bilim jáne jetistikke bastaǵan mansap joly
Dana Qaraǵusova - bilimge qushtar jan. Ol Ulybrıtanıadaǵy Esseksk ýnıversıtetinde ekonomıka bakalavryn, keıin London ýnıversıtettik kolejinde magıstr dárejesin alǵan.
Óziniń suhbattarynyń birinde ol 16 jasynda dúkende jumys istep, alǵash ret óz eńbeginiń jemisin kórgenin aıtqan edi.
sýret: instagram.com/dannakar
2005 jyly Dana eńbek jolyn Food Contract Corporation kompanıasynyń Londondaǵy ókildigin basqarýdan bastady. Eki jyl Anglıada tájirıbe jınaǵan soń, 2007 jyly elge oralyp, First Media Group marketıń holdıńin qurdy.
Keıin ol L’Officiel Kazakhstan jáne L’Officiel Hommes Kazakhstan jýrnaldarynyń baspageri retinde sán ındýstrıasyn jańa deńgeıge kóterdi. Tipti áıgili shef-aspaz Gordon Ramzımen suhbattasý úshin Italıadaǵy Forte Village Resort shıpajaıyna arnaıy barǵan-tyn.
Búginde Dana First Media Group holdıńinde jumysyn jalǵastyryp, Djennıfer Lopes, 50 Cent, Backstreet Boys syndy álemdik juldyzdardyń konsertterin uıymdastyrýmen aınalysady. Sonymen qatar ol Portals mýltımodaldy ekojúıesiniń seriktesi.
"7 balanyń anasy, Álibekovtyń eks-áıeli": jeke ómiri jaıly derekter
Dana - kópbalaly ana. Burynǵy kúıeýi - bloger jáne kásipker Beıbit Álibekov. Erli-zaıypty Aıtýar (2007), Aldıar (2009) jáne Aılın (2013) esimdi úsh balany tárbıeledi.
Ajyrasqannan keıin de olar dostyq qarym-qatynasty saqtap, bir-biriniń jetistikterin qoldap keledi. Keıin Dana Pavel Grebennıkov esimdi sportshy, motokros áýesqoıymen turmys qurdy. Buryn ol da úılengen. Dana jelidegi óz jazbalarynyń birinde Pavel ekeýi 7 bala ósirip otyrǵandaryn jazǵan edi. 2022 jyly olardyń ortaq qyzy dúnıege keldi.
sýret: instagram.com/dannakar
Kılımandjaro, Elbrýs shyńdaryn baǵyndyrǵan tájirıbeli álpınıs
Qaraǵusova bilimge qushtarlyǵynan bólek saıahattaýdy, taýǵa shyǵýdy jany súıedi. Ol Kılımandjaro men Elbrýs taýlaryn baǵyndyrǵan tájirıbeli álpınıs. Sondaı-aq, ol Japonıadan bastap Afrıkaǵa deıingi elderdi aralap tastaǵan.
sýret: instagram.com/dannakar
Ǵaryshqa jetelegen arman
2025 jyldyń kúzi Dananyń ómirindegi jańa kezeńniń bastaýyna aınaldy. Blue Origin kompanıasy jarıalaǵan NS-36 mısıasynyń quramymen ol ǵaryshqa sapar shekti. Bul - Amazon negizin qalaýshy Djeff Bezos qurǵan aerokosmıkalyq kompanıanyń sýborbıtalyq baǵdarlamasy.
8 qazanda New Shepard kemesi 100 shaqyrym bıiktikke kóterilip, ǵarysh keńistigine shyqty. Ushý 10–12 mınýtqa sozyldy, ekıpaj músheleri birneshe mınýt boıy naqty salmaqsyzdyq kúıin sezindi.
sýret: instagram.com/blueorigin
Dana Qaraǵusova ǵaryshty týrıs retinde baǵyndyrǵan tuńǵysh qazaq qyzy. Ol bul saparyn “balalyq armannyń oryndalýy jáne zertteý jobasynyń bir bóligi”, - dep atady.
sýret: instagram.com/blueorigin
Onymen birge ǵaryshqa amerıkalyq kásipkerler men ınjenerler de ushty: Djeff Elgın, Klınt Kellı III, Aaron Núman, ýkraınalyq bıznesmen Vıtalıı Ostrovskıı jáne aty-jónin jasyrýdy qalaǵan taǵy bir qatysýshy bar.
Blue Origin mısıasy búkil álemge onlaın kórsetildi. Mıllıonnan astam kórermen alǵashqy qazaq áıeldiń ǵaryshqa kóterilý sátine kýá boldy.
Qosa keteıik, Dananyń ǵaryshqa saparynyń naqty quny Blue Origin tarapynan resmı jarıalanǵan joq. Alaıda ashyq derekterge súıensek, New Shepard kemesindegi bılet baǵasy shamamen 200 myńnan 1 mıllıon dollarǵa deıin (108–540 mln teńge) turady. Keı jaǵdaılarda baǵa 4 mıllıon dollarǵa (2,1 mlrd teńge) deıin jetýi múmkin. Qatysý úshin aldyn ala 150 myń dollar (81 mln teńge) depozıt tóleý qajet. Al alǵashqy bılet 2021 jyly aýksıonda 28 mıllıon dollarǵa (shamamen 12 mlrd teńge) satylǵan.