«Qazaqstanda komýnaldyq tólem qymbat emes»,-deıdi sarapshylar.
Ranking.kz sarapshylary qazaqstandyqtar Ortalyq Azıa jáne TMD-nyń kóptegen elderine qaraǵanda, komýnaldyq tólemderge jalaqysynyń az bóligin jumsaıdy degen qorytyndyǵa keldi. Esepteý kezinde olar 260 myń teńge jalaqyny mysalǵa alǵan, sóıtip 55-60 m² páterge ıesi aı saıyn 16-18 myń teńge shyǵyndaıtynyn jazǵan, dep habarlaıdy almaty-akshamy.kz.
«Qazaqstandaǵy komýnaldyq tólemder bir taza jalaqynyń 9,7 paıyzyn quraıdy. Qazaqstannyń kórsetkishine jaqyn ındıkatorlar Venesýela (9,9%), Argentına (10%), Portýgalıa (10,8%), Germanıa (10,8%) jáne Ulybrıtanıa (11,1%) sıaqty elderde baıqalady», - dep atap ótti sarapshylar.
Olar Ulttyq statısıka qyzmetiniń málimetteri uqsas ekenin aıtty: shilde-qyrkúıekte komýnaldyq qyzmetterge, turǵyn úıdi kútip ustaýǵa jáne jóndeýge bir úı ıesi ortasha eseppen aıyna 13 myń teńgeden sál asatyn qarajat jumsaǵan. Al jalpy sharýashylyq shyǵyndary aıyna 307 myń teńge bolǵan. Árıne, el bolǵan soń aramyzda aýqatty otbasylar da, kedeı-kepshikter de bar. Bul árıne, bireýlerge azǵantaı ǵana shyǵyn bolýy múmkin, endi bireýlerge kádimgideı aýyrtpashylyq týdyratyny belgili. Qalaı bolǵanda da, sýdy, jaryqty, gazdy únemdegen adam utady.