Táýelsizdik merekesine oraı Almaty qalasy QAJ departamentine qarasty №11 mekemesiniń jeke quramy qoǵam belsendisi, Jeltoqsan qatysýshysy, «Jeltoqsan aqıqaty» respýblıkalyq qoǵamdyq birlestiginiń múshesi Arıp Qabylanovpen júzdesti.
Arıp Smaıyluly sonaý 1986 jylǵy jeltoqsanda kózimen kórgen oqıǵalarymen bólisip, sol kezeńniń ashshy shyndyǵyn áńgimelep, qazaq jastarynyń azamattyǵyn aıtyp tolǵandy. Jeltoqsan oqıǵasynyń aqyrynda babalarymyz armandaǵan táýelsizdikke qol jetkizgenimizdi, degenmen, osy jolda talaı bozdaqtyń sheıit bolǵandyǵyn atap ótti. Jastardy osynaý egemendiktiń qadirin bilýge, otanshyl, patrıot bolýǵa shaqyrdy.
№11 mekemesinde jazasyn ótep jatqan jasóspirimder Táýelsizdik kúnine arnalǵan óleńderin mánerlep oqydy. Sondaı-aq, olardyń nazaryna ınteraktıvti taqtadan Jeltoqsan týraly slaıdttar usynyldy.
– Elimizdiń egemendigin dáripteıtin, boıǵa qaırat, júrekke rýh beretin jan tebireterlik jyr joldary, jeltoqsannyń yzǵaryn beıneleıtin fılmder júrekterge jol tapty dep oılaımyn. Tarıhı mańyzy zor bul is-shara bizde jazasyn ótep jatqan jastar úshin tárbıe. Biz ózimizge ómiri úlgi azamattardy jıi shaqyratynymyz da sondyqtan. Ár balany túzý jolǵa baǵyttaı bilsek – eń úlken jetistik sol bolmaq, – degen mekeme bastyǵy, ádilet polkovnıgi Almat Súleımenov Jeltoqsan qatysýshysy Arıp Qabylanovqa mekeme ujymy atynan alǵys bildirdi.