QR ishki ister vıse-mınıstri Igor Lepeha osylaı dedi.
Kóligin 5 mınýttan artyq qyzdyrǵandarǵa aıyppul salynbaıdy, dep habarlaıdy aqshamnews.kz
Májiliste depýtattardyń biri mashınany jylytqany úshin jazaǵa qatysty máseleni kóterdi. Olar qazaqstandyqtardy shatastyrmaý úshin normalarǵa túsinikteme berýdi talap etti.
"Soltústik aımaqtarda qysta kólikti 5 mınýtta qyzdyrý múmkin emes, qyzbaǵan kólikti syndyramyz. Synǵan kólikke aqsha halyqtyń qaltasynan jumsalady", - deıdi depýtat Nartaı Sársenbaev.
Buǵan jaýap retinde vıse-mınıstr Igor Lepeha túsinikteme berdi.
"Kólikti 5 mınýttan artyq qyzdyrmaý kerek degen sóz joq. Bes mınýt týraly sóz toqtaý nemese avtoturaq týraly aıtyldy. Mysaly, men bir jerge barsam, bes mınýttan artyq tursam, mine, sol másele týraly aıtyldy. Mehanıkalyq kólik quraldary eldi mekenderde otalyp tursa, eger bul turǵyndarǵa qolaısyzdyq týǵyzsa, toqtap turýǵa tyıym salynady. Onda da turǵyndardan shaǵym túsken jaǵdaıda shara qoldanamyz. Iaǵnı, júk kólikteri turǵyndarǵa qolaısyzdyq týdyrsa, balalarǵa kedergi keltirse, shara qoldanamyz. Ótken jyly osyndaı úsh shaǵym tústi, olardyń biri prokýratýra tarapynan joıyldy", - deıdi Lepeha.
Vıse-mınıstrdiń aıtýynsha, qoǵamda daqpyrt týdyrǵan bul másele túımedeıdi túıedeı etip kórsetý.
"Kólikti qyzdyrǵany úshin aıyppul salynbaıdy. Eger qazir avtoturaq 10-15 mınýt tursa, kólik keptelisin týdyrady. Ásirese, saýda úılerinde, magıstral boıynda. Meniń oıymsha, bul problema oıdan shyǵarylǵan. Biz depýtattarmen bul máseleni qarastyryp jatyrmyz, kez kelgen usynystan bas tartpaımyz", - deıdi Lepeha.