Jumysyńyzdy aıaqtap, kóshege shyqsańyz kóligińizdi aıyp alańyna alyp ketipti. Osyndaı jaǵdaıda Siz aldymen qandaı áreketke kóshýińiz kerek?
Jalpy kólikti evakýasıalaýdyń kóptegen sebepteri bar. Solardyń eń jıi kezdesetin eki túri bar. Ol:
Siz kóligińizdi múgedekterge arnalǵan turaqqa qoıdyńyz (597-bap, 4-bólim);
Siz kólikti «avtoturaqqa tyıym salynady» belgisiniń aýmaǵyna qaldyrdyńyz (597-bap, 3-bólim).
Jalpy jol polısıasynyń qyzmetkerleri kóligińizdi evakýasıalamas buryn sizge qońyraý shalyp, mashınańyzdy aıyp alańyna alyp ketetini týraly eskertýi kerek. Eger siz ony alyp ketpes buryn kólikke qaıta oralsańyz, polısıa qyzmetkerleri ony aıyppul turaǵyna alyp ketýge quqyǵy joq.
Jol polısıa qyzmetkerleri ÁQBtK-niń 597-baby boıynsha Sizge 10 AEK (36 920 teńge) mólsherinde aıyppul salýǵa mindetti. Buǵan deıin de osyndaı áreketke jol berip, qaıtalanǵan bolsa onda aıyppul mólsheri 15 AEK-ke (55 380 teńge) deıin salynady.
Eger kóligińizdi aıyppul turaǵyna alyp ketken bolsa, ne isteý kerek?
Eń alǵashqy áreketińiz 102 nómirine qońyraý shalý kerek. Sóıtip, operatorǵa avtomobıldiń memlekettik nómirin aıtasyz. Dál osy aqparattan keıin, operator sizge evakýatordyń borttyq nómiri jáne aıyppul alańynyń meken-jaıy habarlaıdy.
Mine, osydan keıin aıtylǵan meken jaıdaǵy aıyp turaǵyna baryp, kólikti alyp ketken ınspektordy kútesiz. Ol sol jerde bolýy múmkin nemese taǵy basqa kólikterdi evakýasıalaýǵa ketýi múmkin.
Inspektor sizge aıyppul jazyp, bazadan ózge de bereshekterińiz bar-joqtyǵyna kóz jetkizýi tıis. Eger bazada «taza» bolsańyz, onda tek buzǵan kináńiz úshin aıyppul tóleısiz. Egerde ózge qaryzdaryńyz bolǵan jaǵdaıda tolyǵymen tóleýińizge týra keledi.
Aıyppul tólengennen keıin kólikti evakýasıalaǵan aýdannyń ákimshilik polısıa bólimine baryp, aıyppuldy tólegenińizdi túbirtek arqyly dáleldeýińiz qajet. Mine osydan keıin kóligińizdi turaqtan shyǵarýǵa ruqsat etiledi.
Qysqasy, ýaqyt únemdeý úshin joldyń tyıym salynǵan jerine kóligińizdi qaldyryp, bir kún ýaqytyńyzdy sarp etýińiz múmkin. Sondyqtan bara jerińizge aldyn ala josparlap ertereek jetińiz. Sonda tyıym salynbaǵan orynǵa qoıasyz jáne artyq shyǵyndalmasyńyz anyq.