Mamandar sýdaǵy qaýipsizdik erejelerin saqtaý qajettiligi týraly eskertedi.
Almaty qalasynyń TJD, 109 qutqarý qyzmetiniń qutqarýshylary, polıseıler men eriktiler qalanyń sý aıdyndarynda qaýipsizdikti qamtamasyz etýdi jalǵastyrýda, dep habarlaıdy Almaty-akshamy.kz.
18 shildede keshki 17-de Saıran kóliniń janynda týystarymen demalyp otyrǵan 16 jasar R-nyń aıaq kıimin tolqyn 15 metr qashyqtyqqa alyp ketti. Jasóspirim aıaq kıimin qaıtarý úshin birden sýǵa súńgidi.
Kenetten aıaǵynyń astyndaǵy jerdi sezinbegen bala boıyn úreı basyp, sýda tunshyǵa bastady. Bul ýaqytta 109 qyzmetiniń qutqarýshylary jaǵalaýdan jas jigittiń batyp bara jatqanyn kórip, qutqarý sheńberin laqtyryp, ýaqytynda kómek kórsetti. Olar sýǵa batyp bara jatqan jas jigitti jaǵalaýǵa, qaýipsiz jerge jetkizip, ata-anasyna aman-esen tabystady. Medısınalyq kómek qajet bolmady.
Qalanyń sý qoımalarynda demalýshylar qarapaıym qaýipsizdik talaptaryn saqtamaı, onyń sońy kóbinese qaıǵyly jaǵdaılarǵa ákelip jatatynyn atap aıtqan jón.
Qalanyń sý aıdyndarynda jazataıym oqıǵalardy boldyrmaý maqsatynda TJD, PD qyzmetkerleri, 109 qyzmetiniń eriktileri men qutqarýshylary patrúldeý jumystaryn júrgizedi.
«Demalys kúnderi Saıran kólinde QR ÁQBK 440-babyna sáıkes patrúldeý kezinde qoǵamdyq oryndarda alkogóldik ishimdikter ishkeni úshin 26, 30, 36 jastaǵy úsh er adamǵa aıyppul salyndy. Olardyń barlyǵy sý aıdynynda alkogóldik mas kúıinde bolǵan, al 5 adam tyıym salynǵan jerlerde shomylǵany úshin ÁB týraly QRK 364-baby boıynsha ákimshilik jaýapkershilikke tartylǵan»,– delingen Almaty qalasynyń Tótenshe jaǵdaılar departamentiniń habarlamasynda.
Halyqpen aldyn alý jumysynda TJD belsendi kómekshileri «Lıder kz», «Qazaqstan Eriktiler lıgasy» eriktileri birge jumys jasaýda. Eki kún ishinde 300-den astam sýǵa shomylýǵa kelýshilermen túsindirý áńgimesi ótkizilip, shomylý kezindegi qaýipsizdik jadynamalary taratyldy.
TJD Almaty qalasynyń barlyq turǵyndary men qonaqtaryna sýdaǵy qaýipsizdik erejelerin saqtaý qajettiligi týraly eskertedi.
