«Almaty – bizdiń ortaq úıimiz» naýqany 8 sáýirden bastap bir aı ishinde megapolıste ótedi.
Shara jeti kúnge sozylatyn birneshe kezeńnen turady, dep habarlaıdy almaty-akshamy.kz.
Birinshi kezeń – «Bizdiń qala — bizdiń kósheler» baǵyty boıynsha ótedi. Ol 14 sáýirge deıin jalǵasady. Josparlanǵan jumystar sheńberinde joldardy ortasha jóndeý, qıraǵan ýchaskelerdi qalpyna keltirý, qajet bolǵan jaǵdaıda jıekterdi aýystyrý, aıaldama keshenderin tazalaý, jerústi men jerasty ótkelderin jýý, tósemderdi qalpyna keltirý jáne taǵy basqalar kózdelgen.
Bilim berý baǵytyna erekshe mán beriledi. Keń aýqymdy aksıa aıasynda Ekologıa týraly fılmniń tegin kórsetilimi, qoqys suryptaý keshenine «Qoqysty durys surypta» týry, oqýshylar arasynda pikirtalas, sondaı-aq qalanyń ekologıalyq máselelerin sheshýge baǵyttalǵan startap-jobalar baıqaýy ótedi.
Kóktemgi jańartýǵa barsha beı-jaı qaramaıtyn qala turǵyndary qatysa alady. Olar óz aýlalary men irgeles aýmaqtardy retke keltiredi. Sondyqtan ekinshi kezeń "Bizdiń qala – bizdiń aýla, bizdiń úı" dep atalýy kezdeısoq emes. Qala turǵyndary 20 sáýirde josparlanǵan senbilik-aǵash otyrǵyzýǵa, qorshaýlar men oryndyqtardy boıaýǵa belsendi qatysý arqyly ózderiniń azamattyq jaýapkershiligin kórsete alady. Megapolıste alǵash ret "Qoqysty bir staqan kofege aıyrbastaý" aksıasy ótedi. Sondaı-aq, "Úzdik aýla", "Úzdik aýla sypyrýshy" jáne "Komýnaldyq qyzmettiń úzdik qyzmetkeri" baıqaýlaryn ótkizý josparlanǵan.
Naýqannyń kelesi kezeńi – "Bizdiń qala – bizdiń taýlar, ózender men kólder" - jaǵalaýlar men sý aıdyndaryn, saıabaqtardy, skverler men taý bókterin tazartýǵa baǵyttalǵan.
Jobanyń qorytyndy sońǵy akordy qalalyq senbilikter, kóshetter men gúlder otyrǵyzý, "Tazalyq jáne densaýlyq kúni" marafony, tanymdyq ekskýrsıalar, sondaı-aq sýburqaqtar kúnin qamtıtyn "Bizdiń qala — bizdiń maqtanyshymyz" aksıasy bolady.
Qalany eń taza ári jaıly etýge degen umtylys ár turǵynnyń boryshy. Birlese atqarǵan jumys árdaıym jeńil. Bastamaǵa kásipkerler, mádenıet pen sport juldyzdary, sondaı-aq qoǵam qaıratkerleri qoldaý bildirdi.
Esterińizge sala keteıik, 8 sáýirde «Almaty – bizdiń ortaq úıimiz» naýqany bastaldy. Árbir turǵyn qalanyń damýy men abattandyrylýyna óz úlesin qosa alady.
Barlyq aqparat almaty.kz saıtynda, Almaty ákimdiginiń áleýmettik jelilerinde ornalasqan. Sondaı-aq, veb-saıtqa arnaıy QR-kod arqyly qala boıynsha ornalastyrylǵan bannerlerde, plakattarda jáne afıshalarda kirýge bolady.