Úkimette birinshi jartyjyldyqtaǵy ınflásıa qorytyndysy shyǵaryldy, dep habarlaıdy aqshamnews.kz vedomstvonyń baspasóz qyzmetine silteme jasap.
Úsh apta qatarynan kartop baǵasy 1,3%-ǵa arzandasa, ótken aptadan sábiz baǵasy 0,9%-ǵa tómendeı bastady
Belgili bolǵandaı, erte pisken ónimdi jappaı jınaý bastalysymen, aldyn ala kútilgendeı, áleýmettik mańyzy bar kókónister baǵasynyń ósýi toqtap qana qoımaı, tómendeı bastaǵan.
"Eger sáýirde áleýmettik ónimderdiń ortasha baǵa ındeksi 1,6%-dy qurasa, mamyrda ósý qarqyny 1%-ǵa, al maýsymda - 0,7%-ǵa tómendedi. Sońǵy aptada ósim nebary 0,1% boldy. Sonymen qatar, úsh apta qatarynan kartop baǵasynyń 1,3%-ǵa tómendeýi baıqaldy. Ótken aptadan sábiz baǵasy 0,9%-ǵa arzandaı bastady. Kúrish, qaraqumyq, jumyrtqa, un men makoron ónimderiniń baǵasy túsip jatyr. Nan men sút baǵasy turaqty bolyp tur", dedi saýda jáne ıntegrasıa birinshi vıse-mınıstri Aıjan Bıjanova.
Qazaqstanda otandyq azyq-túlik óndirisi artyp keledi. 2025 jyldyń 5 aıynda onyń kólemi 10,5%-ǵa ósip, 1,5 trln teńgeni qurady.
Áleýmettik azyq-túlik taýarlarynyń ishinde eń kóp ósim myna azyq-túlik túrlerine tıesili:
qyzylsha qanty (4,6 myń tonnadan 64 myń tonnaǵa deıin);
ósimdik maıy (316,3 myń tonnadan 376,8 myń tonnaǵa deıin);
sary maı (13 myń tonnadan 15 myń tonnaǵa deıin);
un (1,3 mln tonnadan 1,4 mln tonnaǵa deıin);
ashytylǵan sút ónimderi (102 myń tonnadan 106 myń tonnaǵa deıin);
óńdelgen sút (264 myń tonnadan 274,6 myń tonnaǵa deıin).
Aqyly qyzmetter birinshi jartyjyldyqta ınflásıa ósiminiń negizgi faktory boldy (16,1%). Osyǵan baılanysty úkimet komýnaldyq qyzmetter tarıfiniń ósý qarqynyn retteý týraly sheshim qabyldady. Olardyń ósýin ishinara keıinge qaldyrdy.
Bul azamattardyń qarjylyq júktemesin azaıtýǵa jáne ınflásıa deńgeıin turaqtandyrýǵa múmkindik beredi, deıdi úkimettegiler.