Sportshylarymyzǵa kúsh berip, bıikterden kórinedi dep senemiz!
Azıada, Hanchjoý-2022: Olımpıadalyq qalashyqta Qazaqstannyń týy resmı kóterildi Hanchjoý qalasynda Qazaqstan týyn kóterýdiń saltanatty rásimi ótti, dep habarlaıdy Almaty-akshamy.kz.
Bul is-shara qazaqstandyq sport delegasıasynyń Azıa oıyndaryna resmı túrde kelgenin bildiredi. QR UOK Sport dıreksıasynyń dırektory Elsıar Qanaǵatov sportshylardy HİH Azıa oıyndarynda el namysyn laıyqty qorǵaý kerektigin jetkizdi.
«Jarysty uıymdastyrý joǵary deńgeıde, Olımpıada oıyndarynan kem túspeıdi. Qazaqstandyq delegasıanyń bir bóligi Qytaıǵa kelip, atletter aýylyna ornalasty. Ózderińiz bilesizder, Azıa oıyndary bizdiń qurama úshin óte mańyzdy. Óıtkeni munda medaldar ǵana emes, birneshe sport túrinen Olımpıada lısenzıalary da oınalady. Sportshylarymyz jaqsy óner kórsetedi dep úmittenemiz», - dedi Elsıar Qanaǵatov resmı rásimnen keıin.
QR TSM Sport jáne dene shynyqtyrý isteri komıteti Sportty damytý dıreksıasynyń dırektory Oralbaı Jaqsymbetov te sportshylarǵa sáttilik tilep, olardyń barlyǵyna qurlyqtyq jarysqa sapaly daıyndalý úshin barlyq jaǵdaı jasalǵanyn atap ótti.
«Azıa oıyndary – bul qurlyqtyq Olımpıada. Munda sary qurlyqtyń úzdik sportshylary jınalady. Biz qalashyqta sportshylarmen birge turyp, olardyń esh nársege muqtaj bolmaýyn jeke baqylaýdamyz. Ulttyq qurama tolyqtaı jabdyqtalǵan. Oıyndarǵa daıyndyq biz oılaǵandaı ótti. Kedergiler joq. Komandamyzǵa sáttilik pen jeńister tileımin», - dedi Oralbaı Jaqsymbetov.
Saltanatty sharaǵa bokstan Qazaqstan quramasynyń úzdikteriniń biri Sáken Bıbosynov qatysty. Sportshy marapattaý rásimi kezinde kók baıraǵymyzdyń taǵy jelbireýi úshin qoldan kelgenniń bárin jasaýǵa ýáde berdi.
«Bul men úshin birinshi Azıa oıyndary. Biz qatysatyn sport túrinen olımpıadalyq lısenzıalar sarapqa salynady. Olar tek fınalısterge beriledi. Sondyqtan básekelestik óte joǵary bolady. Men tek joǵary nátıjege jetýdi maqsat etemin. Al bizdiń barlyq boksshylar munda jeńis pen lısenzıa úshin keldi. Jetistikke jetetinimizge senemiz», – deıdi sportshy.
Jazǵy Azıa oıyndarynyń resmı ashylý saltanaty 23 qyrkúıekte ótedi.
Buǵan deıin jazǵanymyzdaı Qazaqstan quramasy sapynda 524 sportshy baq synaıdy. Olar 40 sport túriniń 30 túri boıynsha óner kórsetedi. Otandyq sportshylar 44 dısıplına boıynsha júldeli oryndarǵa talasyp, 305 medal jıyntyǵyn sarapqa salady. Jalpy Azıa oıyndarynda 61 dısıplına boıynsha barlyǵy 481 medal jıyntyǵy oınatylady.