Almaty ákimi Darhan Satybaldy turǵyndardan kóptegen shaǵym túsken birqatar problemalyq nysandardy aralap shyqty, dep habarlaıdy aqshamnews.kz
Ol ınjenerlik jeliler, jol ınfraqurylymy jáne qala turǵyndarynyń qaýipsizdigi máseleleri óz baqylaýynda ekenin atap ótti.
Bostandyq aýdanyndaǵy Ermensaı shaǵynaýdanynda ákim nóser jaýynnan keıin búlingen ınjenerlik jelilerdi qalpyna keltirý jumystaryn jedeldetýdi talap etip, atalǵan jumystardy jeltoqsanǵa deıin tolyq aıaqtaýdy jáne kún saıyn sapasy men merzimin tekserýdi tapsyrdy.
Úlken Almaty ózeniniń arnasyn qaıta qurý barysynda granıt plıtalaryn paıdalaný kezinde zańbuzýshylyqtar men daýly jaıttar anyqtaldy. Darhan Satybaldy merdigerlerden túsinikteme berýdi talap etip, qurylys zańnamasyn qatań saqtaý qajettigin atap ótti. Ákim bul nysannyń quqyq qorǵaý organdarynyń qatysýymen jeke baqylaýda bolatynyn eskertti.
Áýezov aýdanyndaǵy Amanjol kóshesinde 16 qyrkúıekte jol tósemi opyrylyp, 13 avtokólik zaqymdandy. Osyǵan baılanysty ákim merzimniń sozylyp ketkenin eske salyp, merdigerge zardap shekken turǵyndarǵa keltirilgen shyǵyndy óteýdi mindettedi.
Darhan Satybaldy barlyq problemalyq nysan ákimdiktiń erekshe baqylaýynda ekenin atap ótti. «Jumys sapaly ári ýaqytynda oryndalýǵa tıis. Baqylaý qatań bolady, merdigerler tolyq jaýap beredi jáne turǵyndarǵa kelgen shyǵyndy óteýge mindetti», — dedi qala ákimi.
Almaty ákimdigi ınjenerlik jelilerdi qaıta jańartý, tótenshe jaǵdaıdyń saldaryn joıý jáne qalalyq ınfraqurylymdy jańǵyrtý jumystaryn jalǵastyrýda.
Eske salsaq, Almaty ákimi jol tóseminiń shógýi men jıektasty aýystyrýǵa baılanysty Áýezov jáne Medeý aýdandarynyń ákimderine, sondaı-aq Ekologıa basqarmasynyń basshysyna sógis jarıalap, Bostandyq aýdany ákiminiń orynbasaryn tıisti baqylaý júrgizbegeni úshin qyzmetinen bosatqan bolatyn. Asfálttyń opyrylýy men granıt plıtalaryn zańsyz paıdalanýǵa qatysty qyzmettik tergeý júrgizilýde.