Qyrkúıekte Qaraǵandy, Qostanaı oblystary men Shymkent qalasynda bastaý alǵan «Kitap oqıtyn ult» jobasynyń alǵashqy kezeńi óz máresine jetti.
«Kitap oqıtyn ult» jobasy – elimizde turaqty oqý mádenıetin qalyptastyrýǵa baǵyttalǵan aýqymdy zıatkerlik-aǵartýshylyq bastama. Negizgi maqsaty – kitap oqýdy nasıhattaý, synı oılaýdy damytý jáne kitapty bilim, shabyt jáne zıatkerlik ósýdiń negizgi kózi retinde nyǵaıtý.
Joba Qazaqstan Respýblıkasynyń Prezıdenti Qasym-Jomart Kemeluly Toqaevtyń Ulttyq quryltaıdyń III otyrysynda aıtylǵan tujyrymdamasy aıasynda júzege asyrylady jáne Qazaqstandy álemdegi eń kóp kitap oqıtyn on eldiń qataryna shyǵarýdy kózdeıdi.
Bir aı kóleminde 3 aımaqtan 189 221 adam qatysýǵa ótinim berdi.
Qaraǵandy oblysy boıynsha 67 438 qatysýshy tirkelse, Qostanaı oblysy boıynsha 55 281 azamat ótinim bergen. Al Shymkent qalasynan 66 502 ótinim kelip tústi.
Onyń ishinde 6-10 synyp aralyǵyndaǵy 87 157 oqýshy, 14 049 pedagog, 2388 jergilikti deńgeıdegi memlekettik qyzmetshi, sonymen qatar 36 553 otbasy, 29 085 kolej jáne joǵarǵy oqý orny stýdenti qatysýda.
Baıqaý qatysýshylary «Kitap oqıtyn mektep», «Kitap oqıtyn pedagog», «Kitap oqıtyn áýlet», «Kitap oqıtyn kolej», «Kitap oqıtyn ýnıversıtet» jáne «Kitap oqıtyn memlekettik qyzmetker» negizgi alty sanat boıynsha saıysqa túspek.
Jobanyń ekinshi kezeńinde tirkelgen ár qatysýshy, bekitilgen tizimdegi 15 kitapty oqýy kajet. Ár baǵyt úshin sarapshylar men tıisti salanyń ókilderi daıyndaǵan tizim qatysýshylardyń jasy men qyzyǵýshylyqtaryna beıimdelgen, shyǵarmalardy tańdaýda patrıotızm, jaýapkershilik, bilimge qushtarlyq, synı oılaý sıaqty qundylyqtardy damytýǵa basa nazar aýdaryldy.
Bul tizimderge «Qazaqstan ádebıetiniń 100 tanymal kitaby» jalpyulttyq daýys berý arqyly iriktelgen shyǵarmalar, álemdik ádebıettiń úzdik týyndylary jáne ulttyq mádenı muramyzdy nasıhattaıtyn shyǵarmalar, sondaı-aq álemdik deńgeıde moıyndalǵan bestsellerler endi.
Ár baǵyt boıynsha erejeler men oqýǵa usynylatyn kitaptar tizimi www.reading-nation.kz saıtynda jarıalanǵan.
«Kitap oqý – meniń ómirimniń ajyramas bóligi. Aıyna kem degende eki-úsh kitap oqymasam, ózimdi tolyq sezinbeımin. «Kitap oqıtyn ult» jobasy sıaqty bastama biz sıaqty kitapqumar jastarǵa úlken múmkindik syılaıdy. Aldaǵy kezeńde baıqaýdyń jeńimpazy ataný úshin bar kúsh-jigerimdi salamyn jáne bul jobanyń oqý mádenıetin damytýǵa qosar úlesi zor dep esepteımin», - dedi Joba qatysýshysy Qostanaı oblysy №31 mektebiniń 10 synyp oqýshysy Ragımova Anel.
«Memleket basshysynyń «Kitap oqıtyn ult» bastamasyn qoldaý arqyly azamattar arasynda kitap oqýǵa degen qyzyǵýshylyqty arttyrý jáne oqý mádenıetin qalyptastyrý maqsatyndaǵy bul aýqymdy joba elimiz úshin óte mańyzdy. Biz ártúrli sanattaǵy azamattarmen kezdesýler ótkizip, túsindirý jumystaryn júrgizgende olardan tek oń pikirler estidik. Jobaǵa qatysýǵa nıet bildirýshiler sany óte kóp, al júlde qory da tartymdy. Eń bastysy, bul joba arqyly elimizde kitap oqıtyn qaýymnyń sany artyp, oqý mádenıeti jańa deńgeıge kóteriledi dep senemiz», - dedi Joba avtory Baqytjan Turlybekov.
Jobany «Kitap oqıtyn ult – Chıtaıýshaıa nasıa» qoǵamdyq qory «Amanat» partıasynyń jáne Qaraǵandy, Qostanaı oblys jáne Shymkent qalasy ákimdikteriniń qoldaýymen júzege asyrýda. Bas demeýshi — Alageum Electric kompanıasy.
Baıqaýdyń qorytyndysyn 2026 jylǵy sáýirde jarıalaý josparlanyp otyr.