Almatyda «BAURZHAN Foundation» qorynyń qoldaýymen jáne Almaty qalasy ákimdiginiń Mádenıet basqarmasy men Ortalyqtandyrylǵan kitaphana júıesiniń uıymdastyrýymen «Kitap Fest» kitap festıvali ótti.
«Kitap Fest» – jyl saıyn elimizdegi iri megapolıste kitap súıer qaýymdy biriktiretin almatylyqtardyń ómirindegi aıtýly mádenı-buqaralyq shara. 2014 jyldan beri uıymdastyrylyp kele jatqan festıvál bıyl óziniń 10 jyldyq mereıtoıyn atap ótýde. Bıylǵy festıvál dástúrli túrde qala kúnine oraılastyrylǵan.
«Kitap Fest» – Qazaqstandaǵy alǵashqy jáne eń iri kitap festıvali. 10 jyl ishinde bul sharaǵa 70-ten astam baspa men kitap dúkenderi qatysyp, 500-ge jýyq jańa kitap tanystyryldy. Bıyl festıvál erekshe baǵdarlama usyndy: ol eki kúnge sozylyp, «Keleshek kitaby» taqyrybynda ótti.
Kelýshilerdi aýqymdy mádenı baǵdarlama, qazaqstandyq avtorlarmen kezdesý, jańa kitaptardyń tusaýkeseri, sheberlik synyptary, baıqaýlar jáne balalarǵa arnalǵan tanymdyq baǵdarlamalar kútti. Sonymen qatar, otandyq baspagerler men kitap dúkenderiniń qatysýymen úlken kitap jármeńkesi uıymdastyryldy. Festıvál aıasynda «Aýylǵa kitap» dástúrli aksıasy da ótti, onda qala turǵyndary aýyldyq kitaphanalarǵa kitaptar syılady.
«Kitap Fest Almaty 2024» aıasynda jańa kitaptardyń tusaýkeseri ótip, «Jazýshylar shatyry» jáne «Qazaq qalamgerleri» alańynda qazaq ádebıetiniń damýy týraly pikirler aıtyldy. Sondaı-aq, «ZHAS ALASH» shatyrynda jas kóshbasshylar kitap oqýdyń paıdasy týraly oı bólisse, «Kitap FEST WOMEN» alańynda ártúrli salada jetistikke jetken áıelder tabysqa jetýdiń qupıalaryn bólisti.
Kitap jármeńkesinde 60 jetekshi baspa men kitap dúkenderi óz ónimderin 40%-ǵa deıingi jeńildikpen usyndy. Sonymen qatar, sırek kitaptar kórmesi men ıllústratorlar kórmesi de uıymdastyryldy, onda úzdik 35 ıllústratordyń jumystary qoıyldy. «Oqyrman ulttyń urpaǵymyz» kórmesinde mereıtoılary atalyp ótiletin tulǵalardyń arhıvtik fotosýretterinen fotokollajdar jasaldy.
Festıvál aıasynda zıatkerlik oıyndar, balalarǵa arnalǵan oıyn-saýyq sharalary jáne 1 mıllıon teńge kóleminde kitap sertıfıkattaryn utysqa salý syndy túrli is-sharalar uıymdastyryldy.
«Otbasy hrestomatıasy» jobasynyń avtory, jazýshy-ǵalym Sanjar Kerimbaı qazirgi kitap naryǵy men oqyrmandar jaıly: «Qazir de kitap oqylady. Eger jazýshy oqyrmannyń júregine jol taýyp, olardyń suraqtaryna jaýap bere alsa, shyǵarmalary ótimdi bolady», – dedi.
Kórmege kelgen oqyrmandar óz oılarymen bólisip, kitapqa degen qyzyǵýshylyqtyń artyp kele jatqanyn aıtty. «Buryn kitapty jata-jastana oqıtynbyz. Qazir nemerelerge kitap oqytý qıyn, degenmen sońǵy ýaqytta jaqsy shyǵarmalar shyǵa bastady, sondyqtan balalarda kitapqa degen qyzyǵýshylyq artyp keledi», – dep oıymen bólisti oqyrman Qurmanbek Qaldarov.