2024 jyly Almaty tutynýshylaryna 400 mıllıon teńgeden astam qarajat qaıtaryldy
Almaty qalasynyń Óńirlik komýnıkasıalar qyzmeti uıymdastyrǵan brıfıńte Saýda jáne tutynýshylar quqyǵyn qorǵaý departamentiniń 2024 jylǵy 12 aıdaǵy jumysynyń qorytyndysy shyǵaryldy, dep habarlaıdy aqshamnews.kz
Departament basshysynyń orynbasary Nurlan Abdıevtiń aıtýynsha, memlekettik organ azamattardyń 9000-ǵa jýyq ótinishin qarady, jospardan tys 60 tekserý júrgizdi jáne 265 ákimshilik jaza qoldanyldy. Qabyldanǵan sharalardyń nátıjesinde tutynýshylardyń paıdasyna 402 mıllıon teńgeden astam qarajat qaıtaryldy.
«Kelip túsetin ótinimderdiń negizgi úlesi Departament júıeli túrde qaraıtyn bólshek saýda jáne elektrondyq saýda salasyna qatysty. TKSH qyzmetteri salasynda ótinish túsken kezde Departament máseleni jedel sheshý úshin Almaty qalasynyń jergilikti atqarýshy organdarymen turaqty negizde jumys júrgizedi», - dep atap ótti spıker.
Sonymen qatar, tekserý barysynda anyqtalǵan negizgi zańbuzýshylyqtar sapasyz taýarlardy aıyrbastaýdan nemese qaıtarýdan bas tartýǵa, shaǵymdarǵa jaýap berý merzimderin saqtamaýǵa jáne saýda ústemeleri týraly zańnamany buzýǵa baılanysty.
Departament, sonymen qatar, Almaty qalasynyń qoǵamdyq uıymdarymen azamattardyń tutynýshylyq quqyqtaryn qorǵaý salasynda birlesken jumys júrgizedi.
Ótinishterdi qaraýdan basqa, Departament halyqtyń quqyqtyq saýattylyǵyn arttyrý baǵytynda belsendi jumys isteýde. Esepti kezeńde áleýmettik mańyzy bar taýarlarǵa baǵa belgileýdiń deldaldyq sqemalaryn tergeý jónindegi komısıanyń 30 otyrysy ótkizildi, bul 662 buzýshylyqty anyqtaýǵa jáne joıýǵa múmkindik berdi.
Usynylǵan materıaldardyń negizinde saýda salasyndaǵy zańnamany buzǵany úshin ákimshilik sharalar qabyldanady, sonymen qatar tutynýshylar úshin ónimniń túpkilikti quny tómendeıdi.
«Biz týyndaǵan máselelerdi jedel sheshý úshin qoǵamdyq uıymdarmen jáne jergilikti bılik organdarymen belsendi túrde yntymaqtasamyz. Derekterdi taldaý nátıjesi tutynýshylyq quqyqtyq mádenıettiń artqanyn ári josyqsyz kásipkerlik qyzmettiń óskenin de kórsetti», - dep bólisti N. Abdıev.
Sonymen qatar, buqaralyq aqparat quraldarynda jáne áleýmettik jelilerde tutynýshylardyń quqyqtary men satýshylardyń mindetterin túsindirýge baǵyttalǵan aǵartýshylyq is-sharalar turaqty negizde ótkiziledi. Departament azamattarǵa quqyqtyq kómek te kórsetedi, onyń ishinde sotqa deıingi shaǵymdardy jasaý jáne sottarda isti alyp júrý.