Elimizde tis emdeý qyzmeti aqyly, MÁMS qyzmetine kirmeıdi. Desek te jekelegen sanat ókilderi tisin tegin emdetýge múmkindik bar. Olar kimder ekenin bilesiz be?
Josparly stomatologıalyq kómekti 18 jasqa deıingi balalar men júkti áıelder tegin alýyna bolady. Josparly kómekke jaqtyń jáne tistiń rentgenografıasy, plomba salý, aýyrsynýdy basý arqyly qarapaıym jáne kúrdeli tisti julý kiredi.
Al shuǵyl stomatologıalyq kómek myna sanattaǵylarǵa tegin kórsetiledi:
18 jasqa deıingi balalar;
júkti áıelder;
UOS qatysýshylaryna jáne olarǵa teńestirilgenderge;
I, II, III, IV toptaǵy múgedekterge;
"Altyn alqa" jáne "Kúmis alqa" alqalarymen marapattalǵan kópbalaly analarǵa;
Ataýly áleýmettik kómek alýshylarǵa;
Jasy boıynsha zeınetkerlerge;
Juqpaly aýrýlarmen aýyratyn naýqastar.
Shuǵyl stomatologıalyq kómekti erekshe qajettilikteri bar balaǵa kútim jasap, jumys istemeıtinder nemese bala kezinen I toptaǵy múgedekter de tegin ala alady.
Azamattardyń jeńildetilgen sanaty memlekettik emhanada nemese lısenzıasy bar jáne mindetti medısınalyq saqtandyrý qorynyń qatysýshysy bolyp tabylatyn kez kelgen stomatologıalyq klınıkada kómek ala alady. 2021 jyldan bastap mundaı stomatologıa emhanadan joldamasyz qabyldaıdy.
Az qamtylǵan otbasylardan shyqqan 6 jastan 12 jasqa deıingi balalarǵa tis-jaq aýytqýlary (tisteý aqaýlary jáne jaq mıkrognatıasy), týa bitken jaq-bet patologıasy (joǵarǵy erin men tańdaıdyń jyryqtary) bar balalarǵa tegin ortodontıalyq kómek kórsetiledi.
MÁMS boıynsha pasıent josparly nemese shuǵyl stomatologıalyq qyzmet alý úshin emhanaǵa da, jeke klınıkaǵa da júgine alady. Klınıka tizilimde bolýy kerek. Tirkeýshige qońyraý shalý, dáriger qabyldaýyna jazylý jáne qaı klınıkaǵa tirkelgenińizdi habarlaý qajet. Sizdi bazadan tekseredi jáne shynymen tirkeýde bolsańyz, onda qyzmetter tegin kórsetiledi. MÁMS sheńberinde stomatologıaǵa barýǵa lımıt joq.