Parıjde 120-halyqaralyq zamanaýı óner kórmesi ótti.
Salon d 'Automne (Calon d’Otomn) dep atalatyn mádenı is-sharada álemniń túkpir-túkpirinen kelgen myńnan asa ártis óz týyndysyn pash etti, dep habarlaıdy Almaty-akshamy.kz 24.kz-ke silteme jasap.
Óner keshinde qazaqstandyqtar da nazardan tys qalmady. Ásel Sabyrjanqyzynyń shyǵarmashylyǵymen áleýmettik jeli qoldanýshylary jaqsy tanys. Jas talant ıesi kilem ústine qylqalammen sýret salady. Parıjdegi ónersúıer qaýymǵa quralaqan kelmegen. Sheber Uly Dalanyń batyl qyzdaryn beınelegen kilem-kartınasyn kópshilik nazaryna usyndy.
«Meniń shyǵarmashylyǵym el tarıhyndaǵy uly tulǵalarǵa arnalady. Ózimniń zamandastarymdy elge eńbegi sińgen keıipkerlermen tanystyrsam deımin. Sol sebepti týyndylarymdy álem deńgeıinde jaryqqa shyǵarǵym keledi», - deıdi sýretshi Ásel Sabyrjanqyzy.
Kórme basshylyǵy Áseldiń kóztartar týyndylaryna erekshe qyzyǵýshylyq tanytty. Sol sebepti kelýshilerdiń kóz aldynda Fransıa saıasatkeri ári gýmanıs Sımon Veıldiń portretin beıneleýin ótingen. Al kartına Parıj kórmesine tabystalady.
«Bul kórmege kez kelgen el sýretshileriniń qatysý múmkindigi bar. Bastysy, oǵan tirkelýdiń joldaryn bilse jetkilikti. Qazaqstandyq qylqalam sheberlerine erekshe basymdyq bergen sebebimiz, endi olar da bizdiń salon jaıynda bilip, kórmege qatysa alady. Bul ár eldegi shyǵarmashylyq ıelerin bir arnaǵa toǵystyratyn mazmundy is-shara deýge bolady», - Salon D’Automne halyqaralyq kórmesiniń prezıdenti Jıl Gııom.
20-ǵasyrdyń basynda qalyptasqan Salon d’Automne kórmesi áý basta klasıkalyq janrdaǵy týyndylarǵa ǵana arnalǵan. Onda jańa ıdeıalar aıtylyp, túrli baǵyttar dáripteldi. Matıss, Sezanna, Modılánı syndy álemge áıgili sýretshilerdiń shyǵarmalary kópshilik nazaryna usynyldy. Bul joly baǵdarlama aıasynda qazaqstandyq sán kórsetilimi uıymdastyrylady. Sondaı-aq Alla Ilchýnge arnalǵan kitap pen fılmniń tusaýy kesiledi.