Retteý 30 qarasha aralyǵyna deıin júrgizilmek
Qazaqstanda kıik sanyn retteý 15 qyrkúıekten bastap, 30 qarasha aralyǵyna deıin júrgizilýi múmkin. Bul týraly EGTRM Orman sharýashylyǵy jáne janýarlar dúnıesi komıtetiniń tóraǵasy Nurlan Qylyshbaev aıtty, dep habarlaıdy Almaty-akshamy.kz QazAqparat-qa silteme jasap.
«Zoologıa ınstıtýty 2022 jylǵa arnalǵan kıik sanyn retteýdiń bıologıalyq negizdemesin usyndy. Ǵylymı qorytyndyǵa sáıkes, kıiktiń oral popýlásıasy sanynyń kúrt ósýine baılanysty shóp pen sý úshin úı janýarlarymen básekelestiktiń artýyna, kıikterdiń aýyl sharýashalyǵy daqyldarynyń egistik alqaptaryna kirýine oraı olardyń artyq basyn retteý qajettigi týyndap otyr. Mundaı jaıttyń betpaqdala popýlásıasynda da baıqalatyndyǵyn atap ótken jón», - dedi ol elordada ótken «Kıik popýlásıasy sanyn retteý» taqyrybyndaǵy dóńgelek ústel barysynda.
Komıtet tóraǵasynyń atap ótýinshe, bıologıalyq negizdemege sáıkes, usynylyp otyrǵan bıyl rettelýi tıis kıiktiń oral popýlásıasynyń basy onyń jalpy sanynyń 10 paıyzyna teń. Onyń 5 paıyzy atalyq kıik, 47,5 paıyzyn urǵashy kıik jáne 47,5 paıyzyn bıylǵy tóli quraıdy.
«Al Qostanaı men Aqmola oblystarynyń aýmaǵyndaǵy betpaqdala popýlıasy úshin 2022 jyly esepke alynǵan sannyń 2,5 paıyzyn aýlaý usynylyp otyr. Onyń 5 paıyzy atalyq kıik, 47,5 paıyzyn urǵashy kıik jáne 47,5 paıyzyn bıylǵy tóli quraıdy. Kıik sanyn bıologıalyq, sonymen qatar ekonomıkalyq turǵyda retteıtiń ońtaıly merzimi 15 qyrkúıekten bastap 30 qarasha aralyǵyna deıin», - dedi Nurlan Qylyshbaev.