Almaty qalasy aýmaqtyq saılaý komısıasynyń tóraıymy Janna Asanova Almatydaǵy Qazaqstan Respýblıkasy Prezıdentiniń saılaýyn jarıalaýǵa arnalǵan baspasóz ortalyǵynyń alańynda saılaý barysy týraly mańyzdy aqparat berdi.
Jabyq saılaý ýchaskelerinde 12 381 saılaýshy daýys berdi. Aldyn ala ótinish jazǵan 2295 azamat úıinde daýys berýge ótinish bildirgen. Almatydaǵy saılaý ýchaskelerinde 3 myńnan astam ulttyq jáne 43 halyqaralyq baqylaýshy jumys istep jatyr, dep habarlaıdy Almaty-akshamy.kz.
Janna Asanova saılaý komısıasynyń zańǵa sáıkes hattamany kimge berýge quqyǵy bar ekenin taǵy da túsindirdi.
«Zańda daýystardy sanaýǵa qatysqan baıqaýshynyń, senimdi tulǵalardyń daýys berý nátıjeleri týraly hattamany usyný tártibi belgilengen, hattama saılaý komısıasynyń stendilerine de ilinedi. Hattamany BAQ ókilderine berý zańda qarastyrylmaǵan», - deıdi J.Asanova.
Sondaı-aq, baspasóz máslıhaty barysynda Janna Asanova saılaýshylardyń saılaý búlletenin jáshikke salar aldynda sýretke túsirip alýy keń taraǵan jaǵdaıǵa qatysty pikir bildirdi. Mundaı jaǵdaı búgin №55 orta mekteptegi №72 saılaý ýchaskesinde oryn aldy.
«Bul áreket pen úgit júrgizýdiń ara-jigin ajyratyp alý kerek, eger saılaýshy búletendi jáshikke salmaı turyp sýretke túsirip alsa jáne ony eshqaıda jarıalamasa, bul zań buzýshylyq emes. Estelik úshin sýretke túsirýge bolady, biraq eger adam belgili bir kandıdatty tańdaǵanyn kórsetip, ony qoldap búletendi jarıalasa, bul basqa másele. Sondyqtan bul jerde úlken aıyrmashylyq bar», - dep túsindirdi J.Asanova.