Qaraǵandy oblysynyń polıseıleri Ulttyq qaýipsizdik komıteti departamenti qyzmetkerlerimen birlesip, Qarmet AQ jumyskerleri men Abaı qalasy turǵyndaryn bopsalaǵan qylmystyq topty quryqtaýdyń ekinshi kezeńin ótkizdi, dep habarlaıdy almaty-akshamy.kz Polisia.kz-ke silteme jasap.
Eske sala keteıik, İshki ister mınıstrligi ótken jyldyń jeltoqsan aıynda Qarmet kenshilerin bopsalaǵan qylmystyq topty ustaǵan.
Sol kezde qylmystyq toptyń 7 múshesi qamaýǵa alyndy.
Birneshe qylmystyq isti tergeý barysynda ustalǵandarǵa qatysty uıymdasqan qylmystyq top qurý, oǵan basshylyq jasaý jáne qatysý boıynsha sotqa deıingi tergeý júrdi.
Tergeý barysynda jalpy quny 55 mıllıon teńgeden astam ózge de bopsalaý derekteri anyqtaldy.
Sondaı-aq olardyń “Qazaqstan temir joly” AQ obektilerinen taýar-materıal urlaý deregine qatysy bary anyqtaldy.
Osyǵan oraı osy jyldyń 13 aqpanynda polısıa departamentiniń uıymdasqan qylmysqa qarsy kúres basqarmasynyń jáne Ulttyq qaýipsizdik komıteti departamentiniń jedel ýákilderi joǵaryda atalǵan qylmystarǵa qatysy bar taǵy 8 adamdy ustady.
Polısıa qyzmetkerleri 25 tintý júrgizip, tirkelmegen atys jáne sýyq qarý, oq-dári jáne dinı kitaptar tárkiledi.
Olardyń osyǵan uqsas basqa da qylmysqa qatysy tekserilip jatyr.
Atalǵan jumystar İshki ister mınıstrliginiń baqylaýynda.