Shyǵys Qazaqstan oblysy Zaısan aýdanyna qarasty Kensaı aýylynda alty kópbalaly jáne áleýmettik osal otbasyna jańa turǵyn úılerdiń kilti tabystaldy. Bul ıgi is 80 jyldyq Jeńis merekesiniń qarsańynda uıymdastyrylyp, aýyl turǵyndary úshin úlken qýanyshqa aınaldy. Bul týraly Aqshamnews.kz saıty habarlaıdy.
Aýyldaǵy saltanatty is-sharaǵa Zaısan aýdany ákiminiń orynbasary Nurǵaını Kabıdoldına men ishki saıasat bóliminiń basshysy Zúmrad Dúsenbaeva arnaıy qatysyp, jańa qonys ıelerin aýdan ákiminiń atynan quttyqtady. Jańa baspanaǵa ıe bolǵan otbasylarǵa jyly lebizderin bildirip, memleket tarapynan kórsetilip otyrǵan qoldaýdyń mańyzyn atap ótti.
Jańa úılerdiń kiltin alý – tek qonys toı emes, bul – memleket júrgizip otyrǵan áleýmettik saıasattyń naqty nátıjesi. Aýyldyq jerde turatyn kópbalaly jáne áleýmettik osal otbasylarǵa qoldaý kórsetý – óńirlik damý strategıasynyń mańyzdy baǵyty. Aýdan ákimdigi ókilderiniń aıtýynsha, bul – tek bastamasy.
2024 jyldyń ózinde Shyǵys Qazaqstan oblysy boıynsha 232 páter kópbalaly otbasylarǵa, al 518 páter áleýmettik áljýaz toptarǵa berilgen. Bul – halyqtyń baspana máselesin sheshýge baǵyttalǵan aýqymdy jumystyń aıqyn kórsetkishi.
Aýdan ákimdiginiń málimetinshe, 2025 jyldyń sońyna deıin taǵy 180 páterdi salý nemese satyp alý josparlanyp otyr. Bul úıler aýyldyq jerlerde turatyn muqtaj jandarǵa arnalyp, kezekte turǵan azamattardyń jaǵdaıyn jaqsartýǵa sep bolmaq. Sonymen qatar, baspanaǵa muqtaj azamattardy anyqtaý jáne turǵyn úı bólý prosesteri ashyq jáne ádiletti negizde júrgiziletini atap ótildi.
Jańa úıge kirgen otbasylar qýanyshtaryn jasyra almady. Kópbalaly ana Aıjan Qalıaqparova: «Osy ýaqytqa deıin jaldamaly páterde turǵan edik. Bul úı – biz úshin tek baspana emes, úmit pen bolashaqqa senim», – dep óziniń rızashylyǵyn bildirdi.
Jergilikti bılik ókilderi mundaı jobalar aldaǵy ýaqytta da jalǵasatynyn aıtyp, turǵyndarǵa sáttilik tiledi. Qonys toıyna jınalǵan kórshiler men aýyl aqsaqaldary jańa úı ıelerin aq batasymen qýantty.
Kensaı aýylyndaǵy bul ıgi bastama – Qazaqstandaǵy áleýmettik ádilettilik pen halyqqa jaqyn bolýdyń jarqyn úlgisi. Memlekettik qoldaýdyń arqasynda kóptegen otbasy óz shańyraǵyna ıe bolyp, jańa ómirge qadam basýda. Mundaı bastamalar aldaǵy ýaqytta da jalǵasyp, aýyldyq jerlerdiń áleýetin arttyrýǵa zor úles qosary sózsiz.