4 mamyr kúni elordanyń «Barys» sport kesheninde Jastar hokei lygasy jańa chempıony - «Astana» komandasyn marapattaý sharasy ótti.
Elimizdegi 13 hokeı klýbynyń qatysýymen ótken Jastar hokei lygasy resmı túrde máresine jetip, «Astana» klýby óz tarıhynda alǵash ret top jardy. Chempıonatta 7-oryn alǵan elordalyqtar pleı-offta birden myqtylarǵa tap boldy. Olar shırek fınalda absolútti chempıon sanalǵan «Barysty», jartylaı fınalda byltyrǵy qola júldeger «Torpedo» jáne fınalda tájirıbeli oıynshylardan jasaqtalǵan «Aqtóbeni» jeńip ketti. 2020 jyldan beri 1/4 fınaldan asa almaǵan elordalyqtardyń bul kórsetkishin kópshilik kútpegeni anyq.
«Ókinishke qaraı, buǵan deıingi maýsymdarda shırek fınalda jarysty aıaqtap júrdik. Jigitterimizdiń kelesi kezeńge ótetinine senimderi tómen boldy. Osy maýsymda quramǵa, taktıka, oıyn órnegine aıtarlyqtaı ózgeris engizdik. Iá, bul kórsetkishti sensasıalyq deýge keletin shyǵar. Sebebi biz basty favorıtterdi jarys jolynan shyǵara bildik», - dedi bas bapker Anton Vasın.
Maýsymdy óte sátti aıaqtaýyna ne sebep bolǵanyn da bas bapker aıta ketti.
«Shynyn aıtsaq, maýsymnyń basynda pleı-offqa shyǵý basty maqsatymyz bolǵan edi. Biraq jospardy artyǵymen oryndadyq. Ózge ujymdardan basty ereksheligimiz - jeńiske jetýge degen yntamyz óte joǵary bolyp, sońǵy sátke deıin barymyzdy saldyq», - dep Anton Vasın sózin túıindedi.
Saltanatty sharaǵa hokeı ardagerleri kelip, chempıondardyń qurmetine muz aıdynynda mánerlep syrǵanaýdan qoıylym kórsetildi.