Satýshylar 5 mıllıon teńge bermesek, bazardan ketiredi dep otyr.
Almatydaǵy «Kenjehan» bazarynyń 1,5 myń satýshysy shý shyǵardy, dep habarlaıdy Almaty-akshamy.kz
Bul týraly habarlaǵan KTK arnasynyń málimetinshe, jazda saýda nysany kúrdeli jóndeýden ótedi. Al onyń aqshasyn bazar basshysy osyndaǵy kásipkerlerden bir aıdyń ishinde óndirip almaqshy eken.
«Taqalǵan kezde taǵy «10 myń dollar kerek» deıdi. Rasynda bir aıda 10 myń dollardy is júzinde eshkim shyǵara almaıdy. Ol kepil. Búıtý kerek qoı, birinshi, men ózim zańdy oqyǵanmyn, shart ákelýi kerek, ákimdiktiń ruqsaty kerek. Qyzyl syzyqta bar ma, joq pa?» - deıdi saýdager Qadyráli Jumadúrdi.
Kezinde konteınerdi satyp alǵan kásipkerler taǵy da shyǵynǵa bataıyn dep tur. Al bir jyl buryn aýysqan bazar basshylyǵy buǵan bas qatyrmaıdy deıdi.
«2014 jyly 12 500 dollardan bárimiz satyp alǵanbyz. Endi búgin konteınerlerimizdi keri satyp alýymyz kerek eken. Mysaly, meniń eki ornym bar, 20 myń dollardy bir aıdyń ishinde aıaqasty taýyp bere almaımyn. Óıtkeni aldymyzda maýsym kele jatyr», - deıdi saýdager Anýza Dáýitova.
«Kenjehan» bazary 2014 jyly ashylǵan. Negizinen aıaq-kıim, kıim-keshek jáne qurylys materıaldaryn satady. Eki qabatty konteınerlerden soǵylǵan.
Saýdagerler bazar ákimshiligine shamamen 50 myń, al ony satyp alǵan qojaıynǵa 150 myń teńge tóleıdi. Sonda aı saıynǵy tólem ortasha 200 myń teńgeden asady.
Byltyr kelgen jańa basshyny eshkim kórmegen. Tegin ǵana biledi. Onyń ornyna ózin atqarýshy dırektormyn degen bazar ókili kelgen. Kúrdeli jóndeýge 1 600 saýdagerden 5 mıllıon teńgeden aqsha jınalatynyn aıtyp otyr. Bul – 8 mıllıard teńge. Al modernızasıanyń ózine 10 mıllıard jumsalsa, sonyń 80 paıyzy kásipkerlerdiń qaltasynan shyqqaly tur.
«Úkimet aqsha beredi, bálenbaı mıllıard modernızasıaǵa, qaryzǵa degen, biraq nesıeni ázirge bermeı jatyr. Oǵan sol úshin halyq ózi aqshasyn shyǵarady. Biraq ár adammen kelisimshart jasaımyz», – dedi «Kenjehan» bazarynyń atqarýshy dırektory Ardaq Tajıev.