Jer qoınaýyn paıdalaný quqyǵy beriledi.
Mıneraldyq-shıkizat bazasyn tolyqtyrý, geologıalyq zerdeleýdi arttyrý, jumys istep turǵan óndiris oryndaryn shıkizatpen qamtamasyz etý jáne jańa óndiris oryndaryn qurý maqsatynda Indýstrıa jáne ınfraqurylymdyq damý mınıstrligimen jer qoınaýyn paıdalaný quqyǵy beriledi, dep habarlaıdy Almaty-akshamy.kz Egemen.kz-ke silteme jasap.
Osy jaıynda Úkimet otyrysynda baıandama jasaǵan Indýstrıa jáne ınfraqurylymdyq damý mınıstri Qaıyrbek Óskenbaev málimdedi.
2021 jyldyń qorytyndysy boıynsha, bul maqsatta 1700-den astam lısenzıa berilip, 800-ge jýyq otandyq ıýnıorlyq kompanıa qurylǵan. Búginde jumys istep turǵan óndiris oryndaryn shıkizatpen qamtamasyz etý úshin otandyq bıznes ókilderi ken oryndaryn barlaý boıynsha mindettemeler alyp otyr.
«Memleket basshysynyń tapsyrmasyna sáıkes, qazir barlyq ken oryndaryn tekserip jatyrmyz. Búginde qatty paıdaly qazbalar boıynsha jer qoınaýyn paıdalaný salasynda 499 kelisimshart jáne 1738 lısenzıa iske asyrylýda. Jer qoınaýyn paıdalanýǵa buryn-sońdy berilgen qoldanystaǵy barlyq kelisimshart pen lısenzıalarǵa taldaý jasaldy. Bul 2 myńnan astam qujat. Osylaısha, 118 lısenzıanyń qoldanylýy toqtatyldy. Taldaý qorytyndysy negizinde qoldanystaǵy 1620 lısenzıa boıynsha tıisti sharalar qabyldanatyn bolady», - dep atap ótti Qaıyrbek Óskenbaev.
Endigi kezekte mindettemelerdi oryndaý kórsetkishteri 100 paıyzdan tómen sanalatyn jer qoınaýyn paıdalanýshylar tekseriletin bolady.
Mınıstrdiń aqparatyna sáıkes, jańa sharttar boıynsha árbir jer qoınaýyn paıdalanýshy óńirlik áleýmettik jobalarǵa qatysyp, jańa óndiris oryndaryn qurady. Sonymen birge, jumys istep turǵan óndiristerdi jańǵyrtyp, qosymsha jumys oryndaryn ashady jáne otandyq óndiristik kásiporyndardy shıkizatpen qamtamasyz etedi.