Shymkentte 24 jastaǵy Úmitjan Baltabaev besinshi qabattan qulap qaıtys boldy. Ol jaldamaly qurylysshy bolǵan.Marqumnyń jaqyndary qurylys alańynda qaýipsizdik talaptary saqtalmaǵanyn aıtyp, kinálilerdiń jaýapqa tartylýyna talap etip otyr, - dep habarlaıdy Aqshamnews.kz tilshisi “Informbúro” baǵdarlamasyna silteme jasap.
Ulyn jumysyna attandyrǵan Fatıma Ibragımova eki saǵattan keıin balasy týraly sýyq habar alǵan.
“Óz qolymmen jumysqa jiberdim. Eki saǵattan keıin balań qaıtys bolypty dep estirtti. Men jyndy bolyp qalaıyn dedim. Eki saǵattan keıin ólip qalaıyn dep. Besinshi etajdan qulaǵan. Jerge túsken be, basqa jerge túsken be ony bilmeımin. Sony men bilgim kelip jatyr. Qalaı meniń balam qalaı jerge túsken”, – deıdi marqumnyń anasy.
Qaıǵyly oqıǵa Shymkent qalasyndaǵy turǵyn úı kesheni salynyp jatqan alańda bolǵan. Úmitjan Baltabaev merdiger kompanıaǵa kelisimshartsyz jaldanyp, qara jumys istegen. Marqummen birge aýyldaǵy dosy da eńbek etken. Ol qurylys aýmaǵynda eshqandaı tehnıkalyq ári qaýipsizdik talaptary saqtalmaǵanyn aıtady.
“Baspaldaq sańylaýyna ketip bara jatqanda ashyq jatqan lıft bar. Sol jaqqa bylaı kózim tústi. Aıaq kıim kórgennen keıin basymdy tyqsam, jatyr. Qaýipsizdik tehnıkasy joq. Mysaly, basqa nysandarǵa barsań lestnısy proóm jabyq bolady. Baspaldaq sańylaýy jabyq bolady. Oǵan adam kire almaıdy”, – deıdi Úmitjannyń dosy Azızbek Zakırov.
Qara jamylǵan otbasy bul jaǵdaıdy quzyrly organ ókilderi tekserip, kináli adamdardy jaýapqa tartsyn dep otyr. Aıtýlarynsha, tártip saqshylary mán-jaıdy anyqtaýǵa asyqpaıdy. Qazir jumysshy ólimi boıynsha tergeý júrgizilip jatyr eken.
“Polısıamen atalǵan jazataıym oqıǵa boıynsha qylmystyq is qozǵaldy. Qazirgi tańda oqıǵanyń barlyq mán-jaıyn anyqtaýǵa baǵyttalǵan keshendi tergeý is-sharalary júrgizilip jatyr. Tergeý aıaqtalǵannan keıin is boıynsha prosesýaldyq sheshim qabyldanady”, – dedi Shymkent qalasy polısıa departamentiniń baspasóz qyzmeti.
Qurylys kompanıasynyń ókilderi suhbat berýden bas tartty.
Marqum Úmitjan Baltabaev úıinde 4 uldyń tuńǵyshy. 7 jasynda ákesinen aıyrylǵan jas jigit úıiniń jalǵyz asyraýshysy bolypty. Týystary jigittiń jýyrda shańyraq kóterýdi de josparlap júrgenin jetkizdi.