Almaty ákimi Darhan Satybaldy jumys sapary barysynda Áýezov aýdanyndaǵy áleýmettik nysandardyń qurylys jáne qaıta jańǵyrtý barysyn tekserdi.
Bıyl shildede №2 Almaty memlekettik pedagogıkalyq kolejiniń ǵımaratyna qosalqy ǵımarat salý aıaqtalýy tıis edi. Alaıda «Golden City DS» JSHS shartta belgilengen merzimge úlgermedi. Osyǵan baılanysty Qurylys basqarmasy sotqa talap aryz berip, mindetine salǵyrt qaraǵan merdiger retinde qatysýshylar qatarynan shyǵarý jáne aıyppul óndirý máselesin kóterdi.
Joba boıynsha negizgi ǵımaratpen galereıa arqyly jalǵanatyn eki qosalqy nysan salý qarastyrylǵan. Onda mýltımedıalyq kabınetteri bar oqý korpýsy, zerthana, akt jáne sport zaly, asqana ornalasady. Sonymen qatar stadıon jańartylyp, fýtbol alańy, voleıbol jáne basketbol alańdary salynýda.
Almaty ákimi merzimdi buzǵan merdigerlerdiń qala jobalaryna qatyspaıtynyn, al jekelegen jaǵdaıda quqyq qorǵaý organdary arqyly jaýapkershilikke tartylatynyn atap ótti.
«Kompanıa bul nysandy tolyq aıaqtamaıynsha, jańa tenderlerge qatyspaıdy. Qala qurylysy baqylaý basqarmasy máslıhat depýtattarymen birge jumystardyń sapasy men qarqynyn baqylaýǵa tıis. Eger zańbuzýshylyq anyqtalsa, kompanıany lısenzıasynan aıyrý qajet. Sizder nysandy qarasha aıynyń sońyna deıin tapsyramyz dep ýáde berdińizder – biz apta saıyn tekserip otyramyz», – dedi Darhan Satybaldy.
Sondaı-aq qala basshysy «Altyn Besik» shaǵynaýdanynda 120 oryndyq balabaqsha qurylysynyń barysymen tanysty. Jobanyń júzege asýy syrtqy ınjenerlik jelilerdiń trassasyn túzetý qajettiligine baılanysty sozylyp ketken. Alǵashqy jospar ózgertildi, sebebi qazandyq ǵımaraty Tóle bı kóshesindegi jobaǵa kedergi keltirdi. Nysannyń tolyq aıaqtalýy osy jyldyń qarashasyna josparlanǵan.
Budan bólek, ákim №10 shaǵynaýdanda salynǵan 160 oryndyq balabaqshany aralady. Almaty ákimi jaýapty basqarmalarǵa mektepke deıingi mekemeni sapaly jabdyqtaý máselesine basa nazar aýdarýdy tapsyrdy. Balabaqsha barlyq qajetti qujat daıyn bolǵan soń jumysyn bastaıdy.