Jergilikti deńgeıde ákimderdi saılaý ınstıtýty kezeń-kezeńimen engizilip jatyr.
2023 jyldan bastap qanatqaqty rejımde aýdandar men oblystyq mańyzy bar qalalar ákimderin saılaý ótkiziledi. Bul týraly Ádilet vıse-mınıstri Alma Muqanova aıtty, dep habarlaıdy Almaty-akshamy.kz QazAqparatqa silteme jasap.
Búgin Májiliste «Qazaqstan Respýblıkasynyń keıbir zańnamalyq aktilerine Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly» zań jobasy tanystyryldy. Bul qujatta atalǵan saılaýǵa qatysty tıisti normalar eskerilgen.
«Oblystardyń, respýblıkalyq mańyzy bar qalalardyń, astananyń ákimderin taǵaıyndaý Memleket basshysynyń balamaly negizde máslıhat qaraýyna keminde eki kandıdatýra usynýy arqyly júzege asyrylady. Sonymen qatar, Jergilikti ózin-ózi basqarýdy damytýdyń 2025 jylǵa deıingi tujyrymdamasyna sáıkes, jergilikti deńgeıde ákimderdi saılaý ınstıtýty kezeń-kezeńimen engizilip jatyr. Byltyr aýyldar men kentter ákimderin saılaý ótkizildi. Al 2023 jyldan bastap qanatqaqty rejımde aýdandar men oblystyq mańyzy bar qalalar ákimderin saılaý ótkiziletin bolady», - dedi A. Muqanova zań jobasyn tanystyrý barysynda.
Budan buryn habarlanǵandaı, bıyl 1 qyrkúıekte jarıalaǵan Joldaýynda Prezıdent Qasym-Jomart Toqaev bıyl kúzde kezekten tys Prezıdent saılaýyn ótkizýdi usyndy.