Algebra jáne taldaý negizderi oqý páni boıynsha qorytyndy atestattaýdan ótedi
2023 jylǵy «Altyn belgi» úmitkerlerine talap kúsheıedi. Bul týraly QR BǴM Mektepke deıingi jáne orta bilim komıteti tóraǵasynyń orynbasary Jomart Qarambaev aıtty, dep habarlaıdy Almaty-akshamy.kz QazAqparatqa silteme jasap.
«Kelesi jyldan bastap «Altyn belgi» úmitkerlerine talap kúsheıedi. Olar mynadaı talaptarǵa saı bolýy tıis. Birinshiden, jalpy orta bilim beretin oqý baǵdarlamasyna sáıkes, 10, 11 synyptardaǵy oqý kezeńinde toqsandyq, jyldyq jáne qorytyndy baǵalary 5 bolýy kerek. Sondyqtan kelesi jyly 10, 11 synypta jyldyq jáne qorytyndy baǵa ǵana emes toqsandyq ta, jyldyq ta, qorytyndy da baǵa esepke alynady. Ekinshiden, jalpy orta bilimdi aıaqtaǵannan keıin Nazarbaev zıatkerlik mektepteriniń bazasynda algebra jáne taldaý negizderi oqý páni boıynsha qorytyndy atestattaýdan ótýi kerek», - dedi ol mınıstrliktiń Instagram paraqshasynda ótken onlaın brıfıń barysynda.
Onyń atap ótýinshe, 2023 jyldan bastap «Altyn belgi» úmitkerleri qalǵan tórt pándi ózderi bilim alǵan mektepte tapsyrady.
«Úshinshi talap, úmitkerdiń negizgi bilim berý týraly úzdik atestaty bolýy tıis. Iaǵnı, ol 9 synypqa deıin úzdik oqýy kerek degen sóz», - dedi Jomart Qarambaev.