Memleket basshysynyń tapsyrmasyna sáıkes, elimizde basqarýshylardyń jańa býynyn qalyptastyrýǵa baǵyttalǵan «Bilim berýdegi 1000 kóshbasshy» strategıalyq jobasy júzege asyrylýda.
Joba halyqaralyq ozyq tájirıbege negizdelgen: kóptegen elderde mektep dırektorlaryn taǵaıyndamas buryn olardy arnaıy daıarlaý mindetti talap sanalady. Qatysýshylar oqýdan ótip, úzdik bilim berý uıymdarynda taǵylymdamadan ótedi jáne tálimgerlik qoldaýmen qamtylady. Bul basqarýshylyq qabiletterdi júıeli túrde damytýǵa jáne senimdi sheshim qabyldaı alatyn jetekshilerdi qalyptastyrýǵa múmkindik beredi.
Búgingi tańda respýblıkalyq kadrlyq rezervke 583 pedagog engizilip, olardyń 397-si konkýrstan tys negizde basshylyq qyzmetke taǵaıyndaldy. Tek 2024 jyldyń ózinde 36 rezervıs jańa úlgidegi «Keleshek mektepteri» jobasy aıasynda salynǵan mektepterdiń dırektorlary boldy. ⠀
Jobaǵa qatysýshynyń biri – №290 jaıly mekteptiń dırektory Móldir Smahanova. Ol barlyq kezeńnen ótip, baǵdarlamaǵa saı jan-jaqty daıyndyqtan ótti. Basshylyqqa taǵaıyndalmas buryn zamanaýı basqarý tásilderin meńgerip, kásibı daǵdylaryn jetildirdi.
«Bul joba meniń dırektor qyzmetine degen kózqarasymdy múlde ózgertti. Qazirgi zamanǵy mektepke tek basqarýshy emes, ujymdy yntalandyryp, muǵalimderdiń kásibı damýyna jáne oqýshylardyń qabiletin tolyq ashýǵa múmkindik beretin kóshbasshy qajet. «Keleshek mektepteri» modeli osyndaı jańa basqarý mádenıetin qalyptastyrady», – dedi joba túlegi.
Prezıdenttik jastar kadrlyq rezervi tájirıbesine negizdelgen bul joba 2023 jyldan bastap Qazaqstan Respýblıkasy Oqý-aǵartý mınıstrliginiń bastamasymen júzege asyrylyp keledi. Qatysýshylardy irikteý prosesi bes kezeńnen turady: testileý, oqytý, taǵylymdama, qorytyndy baǵalaý jáne suhbat. 2024 jyly 2,5 myńnan astam úmitkerdiń arasynan kásibı daıarlyq kýrsyna 433 kandıdat iriktelip alyndy.