2023 jyldan bastap veterınarıa qyzmetkerleriniń jalaqysyn kezeń-kezeńimen ósirý josparlanǵan.
Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtyldy, dep habarlaıdy Almaty-akshamy.kz QazAqparatqa silteme jasap.
«Qazirgi ýaqytta Aýyl sharýashylyǵy mınıstrligi 55 is-sharadan turatyn Veterınarıa júıesin reformalaý jónindegi uıymdastyrý is-sharalarynyń josparyn bekitti. Onda osy saýalda kóterilgen usynystar men salanyń problemaly máseleleri de qamtylǵan. Osylaısha jospar aıasynda 2023 jyldan bastap veterınarıa qyzmetkerleriniń jalaqysyn kezeń-kezeńimen ósirý kózdelgen.
Budan basqa, Úkimet «Bıologıalyq qaýipsizdik týraly» zańdy iske asyrý aýqymynda I jáne (nemese) II patogendi toptardyń patogendi bıologıalyq agentterimen jumys isteıtin veterınarıalyq qyzmet salasyndaǵy qyzmetkerlerdiń jalaqysyn ulǵaıtý bóliginde «Qazaqstan Respýblıkasy Úkimetiniń 2015 jylǵy 31 jeltoqsandaǵy № 1193 qaýlysyna ózgerister engizý týraly» qaýly jobasyn qarap jatyr», - dedi Úkimet basshysy jaýabynda.
Sonymen qatar ol veterınarıa mamandaryn azamattyq qyzmetshiler sanatyna qosýǵa qatysty da jaýap berip, memlekettik veterınarıa uıymdary Qazaqstan Respýblıkasynyń zańnamasynda belgilengen tártippen memlekettik-kommýnaldyq kásiporyndar nysanynda da, memlekettik-kommýnaldyq mekemeler nysanynda da jumys isteıtinin aıtqan. Onyń atap ótýinshe, zańnamaǵa sáıkes, memlekettik veterınarıa uıymdarynyń veterınarıa dárigerleri jergilikti atqarýshy organdar uıymdy memlekettik-kommýnaldyq mekemeler nysanynda qurǵan jaǵdaıda azamattyq qyzmetshiler sanatyna jatqyzylýy múmkin.
«Búgingi tańda veterınarıa salasyndaǵy ýákiletti organǵa veterınarıa dárigerine júkteme normatıviniń úlgilik qaǵıdalaryn ázirleý jáne bekitý quzyretin berý máselesi pysyqtalýda», - dedi Álıhan Smaıylov.