Almaty ákimi «Qytaıdyń Sınsın korporasıasy» dırektorlar keńesiniń tóraǵasymen kezdesti
Almaty ákimi Erbolat Dosaevtyń «Qytaıdyń Sınsın korporasıasy» kompanıasy dırektorlar keńesiniń Tóraǵasy Chjan Szánmen kezdesýinde sıfrlandyrý, eski turǵyn úılerdi renovasıa baǵdarlamasy boıynsha ǵımarattar salý, elektrondyq komersıa naryǵyn damytý salasyndaǵy ekijaqty yntymaqtastyq máseleleri qaraldy, dep habarlaıdy Almaty-akshamy.kz.
Kezdesý barysynda SMART City jobalaryn iske asyrýdaǵy qytaı qalalarynyń úlken tájirıbesi atap ótildi: Global Innovation Index-2021 reıtıńine sáıkes Qytaı álemdegi eń ınovasıalyq damyǵan elderdiń arasynda 12-shi orynda (Qazaqstan – 129 eldiń 79-y). Taraptar ahýaldyq ortalyq qurýda, TKSH júıelerin avtomattandyrýda, «Aqyldy qala» jobasy aıasynda qoǵamdyq qaýipsizdik, densaýlyq saqtaý, bilim berý jáne kólik salasynda sıfrlyq sheshimderdi engizýde ózara is-qımyl múmkindigin talqylady.
Jergilikti óndirýshiler úshin ótkizý naryqtaryn keńeıtýge jáne eki el arasyndaǵy ekonomıkalyq prosesterdi jedeldetýge múmkindik beretin elektrondyq saýda platformasyn ázirleýmen birlesken kásiporyn qurý máselesi qaraldy. Aıta keterligi, 2021 jyly Alibaba.com marketpleıste «Gold Supplier» ıeleri retinde Almatynyń 12 kompanıasy atansa, al 2022 jyly – 56 kompanıaǵa jetti. Jańa tehnologıalar salasyndaǵy jumysty jandandyrý úshin IT bızneske ózara jan-jaqty qoldaý kórsetý týraly ýaǵdalastyqqa qoljetkizildi.
Qala basshysy sheteldik ınvestorlardy Almaty ındýstrıaldy aımaǵy men «Inovasıalyq tehnologıalar parki» AEA aýmaǵynda birlesken jobalardy qurýǵa belsendi qatysýǵa shaqyrdy, onda qazirgi ýaqytta qytaı tarapymen birlesip úlken dıametrli bolat dánekerlengen spıraleshov qubyrlaryn shyǵaratyn zaýyt salý («Asia Steel Pipe Corporation» JSHS) sıaqty jobalar tabysty iske asyrylýda, jylý radıatorlaryn óndirý boıynsha («Valtherm» JSHS), elektronıka jáne aspap jasaý salasynda («Bona Electric» JSHS) jáne t. b.
«Qytaıdyń Sınsın korporasıasy» kompanıasynyń dırektorlar keńesiniń Tóraǵasy Chjan Szán qala basshysyna jyly qabyldaǵany úshin alǵysyn bildirip, Almatynyń birlesken ózara tıimdi jobalardy iske asyrý úshin úlken áleýeti ǵana emes, sonymen qatar geografıalyq ornalasýy men qolaıly tabıǵı-klımattyq jaǵdaılarynyń óte tıimdigi ekendigin, sonyń arqasynda kóptegen ınvestorlardy tarta alatynyn atap ótti.
Búginde Almaty qalasynda qytaı kapıtalynyń qatysýymen 1064 kásiporyn jumys isteıdi, onyń ishinde 326 birlesken, 738 sheteldik (Qazaqstanda – 1869). 2022 jyldyń qorytyndysy boıynsha eki el arasyndaǵy ekijaqty taýar aınalymy 40%-ǵa ósip, 6,8 mlrd AQSH dollaryn qurady.