Koronavırýstyq ınfeksıalar týraly statısıka qorqynyshty bolǵandyqtan keıbir memleket halyqqa vaksınanyń úshinshi dozasyn usynyp otyr.
Atap aıtqanda, Germanıanyń 16 federaldy shtatynyń densaýlyq saqtaý mınıstrleri osyǵan kelisken, dep habarlaıdy Almaty-akshamy.kz Euronews.com saıtyna silteme jasap.
Sonymen qatar vaksınalaý baǵdarlamasyna 12 men 17 jas aralyǵyndaǵy turǵyndardy qosý týraly sheshim qabyldandy. Qazirgi ýaqytta Germanıada halyqtyń 52%-dan astamy vaksınanyń eki dozasyn da aldy.
Izraılde bes aı buryn ekpe salynǵan 60 jastan asqan azamattardy qosymsha egý naýqany ótip jatyr. Prezıdent Ishak Gersog alǵashqylardyń biri bolyp amerıkandyq Pfizer kompanıasy preparatynyń úshinshi dozasyn aldy. Eldiń Densaýlyq saqtaý mınıstrliginiń málimetinshe, búginde koronavırýs juqtyrǵandardyń 40%-y balalar men jasóspirimder eken.
Sonymen qatar, vaksınalaý men shekteý sharalaryna qarsy halyqtyń bir bóliginiń narazylyǵy da artyp keledi. Polshada belgisiz adamdar Zamos qalasyndaǵy vaksınalaý beketi men epıdemıologıalyq stansıany órtep jiberdi. Polsha bıligi bul oqıǵany terrorlyq akt dep atady.
Densaýlyq saqtaý mınıstri Adam Nıdzelskıı: «Bul áreketter jergilikti medısına qyzmetkerlerine degen qarsylyq qana emes, bul memleketke qarsy baǵyttalǵan terorızm», - dedi.
Sońǵy kezde agresıanyń mundaı kórinisteri jıilep ketti. Gdynıa qalasynda antıvakselder demalys kúnderi jyljymaly ekpe stansıasyna shabýyl jasady. Áleýmettik saýalnamalar kórsetkendeı, Polsha turǵyndarynyń tórtten bir bóligi ekpe alǵysy kelmeıdi nemese vaksınanyń tıimdiligine áli de kúmánmen qaraıdy.