«Kazahtelekom» 2024 jyldyń sońyna deıin satýdy josparlaǵan «Mobaıl Telekom-Servıs» (MTS, Tele2 men Altel uıaly baılanys operatorlaryn baqylaýshy kompanıa) satylymyn áli jaba almaı otyr. Kompanıa áli de MTS-ke baqylaýdy saqtap otyr, biraq bul aktıvti 2024 jyldyń sońyna deıin satý kerek edi, dep habarlaıdy aqshamnews.kz
«Kazahtelekomnyń» aralyq qarjylyq eseptiligine sáıkes, kompanıa satyp alýshy — katarlyq ınvestor Power International Holding-pen mámileniń barlyq sharttaryn kelisýge qol jetkize almaı otyr. MTS-ti satý týraly kelisim 2023 jyldyń maýsym aıynyń basynda jasalǵan bolatyn, biraq naqty sharttar boıynsha kelissózder uzaqqa sozyldy.
«2024 jyldyń 30 qyrkúıegine deıin MTS-ti satýǵa qatysty kelisimniń barlyq sharttary oryndalmaǵan. Sondyqtan, top MTS-ke baqylaýdy saqtap qaldy. MTS-tiń 100%-yn satý esepti kúnnen keıingi bir jyl ishinde aıaqtalady», — delingen «Kazahtelekomnyń» qarjylyq eseptiliginde.
«Kazahtelekom» úkimettiń talaptaryn oryndamaýy múmkin, sebebi ol «Mobaıl Telekom-Servıs» kompanıasyn jyl sońyna deıin satýdy mindettegen edi. Memlekettik organdar naryqtaǵy básekelestikti arttyrý jáne baılanys qyzmetteriniń ádil tarıfterin qamtamasyz etý úshin MTS-ti satýdy talap etýde.
Kompanıanyń aksıonerleri mámileni 30 sáýirde ótken jalpy jınalysta maquldaǵan. Al 4 maýsymda «Kazahtelekomnyń» basshylyǵy bul sheshimdi resmı túrde rastaǵan.
Mámileniń jalpy quny 713 mıllıard 190,4 mıllıon teńge bolýy tıis edi. Osy somanyń 536 mıllıard 196,4 mıllıon teńgesi MTS aktıvteriniń naqty baǵalaýy, qalǵan bóligi uzaq merzimdi jaldaý men qaryzdar boıynsha mindettemelerden turady.
Bastapqyda mámile 30 qyrkúıekke deıin jabylady dep josparlanǵan bolatyn, biraq bul merzim jyl sońyna aýystyryldy. Qazir «Kazahtelekom» 2024 jyly Tele2 men Altel-di satýǵa úlgere almaıtyndyǵyna qatysty úlken kúmánder bar.
Redaksıa «Kazahtelekom» AQ-qa suraý salyp, satylymdaǵy qıyndyqtardyń sebebin naqtylaýdy josparlap otyr.