Memleket basshysy «Qazaqtelekom» aksıonerlik qoǵamynyń basqarma tóraǵasy Qýanyshbek Esekeevti qabyldady
Qasym-Jomart Toqaevqa «Qazaqtelekom» kompanıalar tobynyń byltyrǵy atqarǵan jumystarynyń nátıjesi týraly esep berilip, aldaǵy kezeńge arnalǵan jospary tanystyryldy.
Prezıdentke 2025 jyldyń sońyna qaraı 5G jelisin jedel engizý jónindegi tapsyrmasynyń oryndalý barysy týraly da baıandaldy.
Qýanyshbek Esekeevtiń aıtýynsha, 7 myńnan astam bazalyq stansıa salý jospary ázirlengen. «Qazaqtelekom» – TMD keńistiginde 5G tehnologıasyn iske qosqan alǵashqy jáne jalǵyz kompanıa.
Budan bólek, Memleket basshysyna qyzmet sapasyn jaqsartý jumystary jóninde málimet berildi. Bıyl kompanıanyń 63 myń abonentiniń eskirgen mys jelisin zamanaýı optıkalyq jelige aýystyrý josparlanǵan. Sondaı-aq 50 myń tutynýshy modeminiń tehnologıalyq jabdyqtary jańartylady.
Sonymen qatar Prezıdentke Qazaqstan men Ázerbaıjan arasynda Kaspıı teńiziniń tabany arqyly Transkaspıı talshyqty-optıkalyq baılanys jelisin salý jobasynyń iske asyrylý barysy tanystyryldy. Bul joba Qazaqstannyń asa mańyzdy óńirlik telekomýnıkasıalyq habqa aınalýyna, el aýmaǵynan ótetin halyqaralyq trafık tranzıtin ulǵaıtýǵa múmkindik beredi.
Kezdesý barysynda Qasym-Jomart Toqaev ekonomıkalyq jáne áleýmettik salalardy sıfrlandyrý óte mańyzdy ekenin atap ótti. Sebebi qazir jańa telekomýnıkasıalyq tehnologıalardyń múmkindikteri eldiń halyqaralyq arenadaǵy básekege qabilettilik deńgeıin aıqyndaıdy.
Memleket basshysy Qazaqstan azamattaryn zamanaýı telekomýnıkasıa qyzmetterimen qamtamasyz etý qajettigine de nazar aýdaryp, kompanıanyń barlyq ınvestısıalyq jobasyn ýaqytyly iske asyrýdy tapsyrdy.