Munaı tasymaldaıtyn 2 qurylǵy jumysyn ýaqytsha toqtatty.
Energetıka mınıstri Bolat Aqsholaqov Májilis alańynda Kaspıı qubyr konsorsıýmyndaǵy munaı tasymaldaý kóleminiń tómendeýine qatysty pikir bildirdi, dep habarlaıdy Almaty-akshamy.kz Egemen.kz silteme jasap.
Mınıstr munaı tasymalynyń azaıýyna Ekinshi dúnıejúzilik soǵys kezinde jarylmaı qalǵan mınalardy zalalsyzdandyrý jumystary sebep bolǵanyn atap ótti. Energetıka mınıstrliginiń basshysy atalǵan jumystar 15-25 maýsym aralyǵynda júrgiziletinin aıtty.
«Men ótken aptada aıtyp ótkenimdeı, teńiz túbinde tıisti jumystardy atqarar aldynda tazartý is-sharalary júrgiziledi. Óıtkeni ol jerde Ekinshi dúnıejúzilik soǵystan qalǵan birshama oq-dári áli de bar», - dedi Bolat Aqsholaqov.
Ol sondaı-aq Qashaǵanda 1 maýsymnan 15 shildege deıin jóndeý jumystary júrgiziletinin, degenmen, qazir munaıdy aılaqtan tasymaldaıtyn bir qurylǵy jumys istep turǵanyn atap ótti.
«Al qalǵan ekeýi teńiz túbin tazartý jumystaryna baılanysty toqtap tur. Kaspıı qubyry konsorsıýmyna jetkiziletin munaıǵa aılaqtan tasymaldaıtyn bir qurylǵynyń qýaty jetedi», - dep túsindirdi Bolat Aqsholaqov.
Mınıstr jóndeý jumystary munaı óndirý kólemine áser etpeıdi dep sendirdi.
Aıta ketsek, Kaspıı qubyr konsorsıýmynyń munaı tasymaldaıtyn 2 qurylǵysy jumysyn ýaqytsha toqtatty.