Qazir jyly keńsede otyryp jumys istegendi nemese aqshaly kásipker bolǵandy qalamaıtyn jan joq. Biraq kúndelikti tirshiligimizdiń árin keltirip otyrǵan qarapaıym eńbek adamdarynyń eńbegin de dáriptep, baǵalap, jumysshy mamandyqtaryna da bir sát moıyn burǵan abzal.
Memleket basshysy jumysshy mamandyqtardyń bedelin arttyrý, tehnıkalyq jáne kásiptik bilim berý júıesin reformalaý qajettigin alǵa tartty. Iá, jumysshy mamandyqtar árqashan suranysqa ıe bolyp qala beredi. Tehnıkadaǵy avtomattandyrý júıesiniń damýyna qaramastan, avtomehanık, avtoelektrık, tiginshi sıaqty birqatar mamandyq mashınalar almastyra almaıtyn arnaıy bilim men daǵdylardy, oı-sanany qajet etetini sózsiz.
Almaty tehnologıa jáne florıstıka kolejindegi bilikti mamandar da stýdentterdiń sapaly bilim alýyna, olardyń tańdaǵan mamandyqtaryn tolyqqandy ıgerip shyǵýyna úles qosyp júr. Ol úshin ustazdar zaman kóshinen qalmaı, óziniń de bilimin jetildirýge yntaly. Eńbek naryǵynda suranysqa ıe mamandar daıarlaý, stýdentterdiń quzyrettiligin arttyrý maqsatynda 2023-2024 oqý jylynda 10 pedagog Almaty qalasy ákimdigi men Almaty qalasy Bilim basqarmasynyń qoldaýymen Germanıa, Qytaı, Italıa, Nıderlandıa memleketterinde, al bıylǵy oqý jylynda 6 muǵalim Túrkıa men Ońtústik Koreıa respýblıkasynyń oqý oryndarynda halyqaralyq taǵylymdamadan ótip, kásibı biliktiligin arttyryp keldi.
Jýyrda shaharda Halyqaralyq taǵylymdamadan ótý baǵdarlamalaryn júzege asyrý aıasynda qalalyq semınar ótti. Oǵan atalmysh kolej pedagogtary da qatysyp, shetelden kórgen, bilgen, úırengenin ortaǵa saldy. Máselen, Ońtústik Koreıanyń Kemhe qalasyndaǵy Kýkche tehnologıalyq ınstıtýtynda taǵylymdaman ótip kelgen kolej dırektorynyń oqý-óndiristik isi jónindegi orynbasary Aıan Nurǵalıev pen óndiristik oqytý sheberi Dıana Omarova «Qazirgi zamanǵy tehnologıalardy paıdalana otyryp, oqý-óndiristik prosesterdi uıymdastyrý» boıynsha jıǵan bilimimen bólisti. Al jıhaz óndirisi mamandyǵy boıynsha óndiristik oqytý sheberleri Almaz Sharıpov pen Aıda Bolatova túrkıalyq áriptesterinen alǵan ozyq tájirıbesin ortaǵa saldy.
·Taqyrypqa oraı
Anar SHARIPOVA, «Tigin óndirisi jáne kıimderdi úlgileý» mamandyǵy boıynsha óndiristik oqytý sheberi:
Jylda 400-deı maman oqytyp shyǵaramyz
Eńbek naryǵynda suranysqa ıe mamandar daıarlaýda bizdiń Almaty tehnologıa jáne florıstıka kolejiniń úlesi salmaqty. Jyl saıyn 400-deı jumysshy mamandyǵyn oqytyp, eńbek naryǵyna qajet bilikti mamandar oqytyp shyǵaramyz. Biz, áriptesim Danıa Adan ekeýmiz Túrkıa memleketiniń Denızlı qalasyndaǵy irgeli Dostek kolejinde uıymdastyrylǵan taǵylymdamadan óttik. Túrik baýyrlarymyz qazirgi zamanǵy tehnologıalardy, turaqty tájirıbeni jáne kıim-keshek salasyndaǵy bilim berý tásilderin zertteý baǵytyndaǵy tájirıbelerin bólisti. Biz de qarap qalmaı, ózimizdegi jetistikterdi, stýdentterdi oqytýdaǵy tyń jobalarymyzdy aıttyq. Boldym, toldym degen adam óspeıdi. Biz eldiń erteńin jasaıtyn bilikti mamandar daıyndap shyǵarý úshin jaqsyny úırenýden, úıretýden jalyqpaımyz.
