Almatynyń №7 qalalyq klınıkalyq aýrýhanasy janyndaǵy emhanada dáriger-ftızıatr Qarakóz Ótemuratova, SÓS kabınetiniń meıirbıkesi Asylajar Janǵazıeva jáne «Balany damytý bólmesiniń» meıirbıkesi Hálıdam Iýsýpova «Mantý synamasy», «BSJ vaksınasy» taqyryptarynda aqparattyq-túsindirý jumysyn júrgizdi.
Dárigerler Mantý synamasyna seziktene qaramaýǵa shaqyrady. Bul – dıagnostıkalyq synama.
– Mantý reaksıasy – bul aǵzanyń arnaıy zatty, týberkýlındi engizýge reaksıasyn baǵalaý, ıaǵnı bul týberkýlezge qarsy ımýnıtetti jáne onyń aýyrlyq dárejesin baǵalaý ádisi. Mantý reaksıasy kezinde adamǵa týberkýlezdi juqtyrý múmkin emes, týberkýlezde Koh taıaqshalary joq. Sondaı-aq, BSJ vaksınasy týraly da aıta ketsek, balaǵa salynǵan BSJ ekpesinen keıingi jaǵymsyz reaksıalar óte sırek kezdesedi (0,02%). Mundaı jaǵdaı, eń aldymen, balanyń ımýnıteti tómendegen kezde kórinis berýi múmkin, – deıdi №7 qalalyq klınıkalyq aýrýhana janyndaǵy emhananyń ftızıatry Qarakóz Ótemuratova.
Jańa týǵan nárestelerge BSJ vaksınasyn kelesi jaǵdaılarda júrgizýge tyıym salynady: bóbektiń salmaǵy eki keliden az nemese 33 apta tolmaı týǵan bolsa; náreste jatyrishilik ınfeksıamen týǵan jaǵdaıda; anasyna AITV ınfeksıasy dıagnozy qoıylsa; ımýnıtet tapshylyǵy baıqalsa; ortalyq júıke júıesi zaqymdansa.
Osy rette profılaktıkalyq (aldyn ala) emdeý týraly da aıta ketsek. Týberkýlezge shaldyǵý qaýpi bar adamdarǵa (týberkýlezben aýyratyn naýqastarmen qatynasta bolǵan; Mantý jáne Dıaskıntest alǵash ret oń reaksıa bergen balalar men jasóspirimder) preparattar qoldanylady, ıaǵnı hımıalyq profılaktıka jasalady. Bul – qaýipti aýrýmen kúresýdiń eń tıimdi ádisteriniń biri. Týberkýlezge qarsy preparat saý adamnyń aǵzasyna túsken týberkýlez mıkobakterıalarynyń kóbeıýin tejeıdi jáne aýrý damymaıdy.
Iá, hımıoprofılaktıka – bul emdeý emes, týberkýlezdiń damýyna qarsy qorǵanys. Aldyn alý kýrsy MSAK medısına qyzmetkerleriniń baqylaýymen 3 aıdan 6 aıǵa deıin sozylady.