Reseıdiń Kamchatka ólkesinde 1952 jyldan beri tirkelgen eń joıqyn jer silkinisi boldy. Seısmologtardyń baǵalaýynsha, jerasty dúmpýleriniń magnıtýdasy 8,5–8,7-ge deıin jetken, - dep habarlaıdy Aqshamnews.kz.
Jer silkinisi Astana ýaqyty boıynsha saǵat 04:24-te bolǵan.
"Qazir ǵana Kamchatka seısmofokaldyq aımaǵynda 1952 jyldan bergi eń joıqyn jer silkinisi tirkeldi. Ártúrli derekter boıynsha, magnıtýdasy 8,7-ge deıin jetedi", — delingen Reseı ǵylym akademıasynyń Geofızıka qyzmetiniń habarlamasynda.
Eýropa-Jerorta teńizi seısmologıalyq ortalyǵy (EMSC) da osyndaı magnıtýda kórsetken.
Zardaptar men japa shekkender
Aımaqtaǵy balabaqshalardyń birinde jer silkinisi saldarynan qabyrǵa qulaǵan. Kamchatka ólkesiniń gýbernatory Vladımır Solodovtyń aıtýynsha, tótenshe jaǵdaı kezinde ǵımaratta adamdar bolmaǵan, zardap shekkender joq.
Gýbernator mamandardyń mektepter, medısınalyq mekemeler jáne basqa da áleýmettik mańyzy bar nysandardy tekserip jatqanyn aıtty.
Kamchatka ólkesindegi TJM dereginshe, Petropavlovsk-Kamchatskıı qalasynda dúmpýlerdiń kúshi 7–8 balǵa jetken.
Sýnamı Kamchatka men Soltústik Kýrılskke jetti
Sahalın oblysynyń gýbernatory Valerıı Lımarenkonyń aıtýynsha, Severo-Kýrılsk qalasynda magnıtýdasy 7,9-ǵa teń jer silkinisi sezilgen. Jaǵalaýǵa alǵashqy sýnamı tolqyny soqqan.
Sahalın oblysy boıynsha TJM qalanyń bir bóligin sý basqanyn habarlady.
Kamchatkada bıiktigi tórt metrge deıingi sýnamı tolqyny tirkelgen. Muny aımaqtyń Gıdrometeorologıa jáne qorshaǵan ortany monıtorıńileý basqarmasy málimdedi.
Basqa elderge tóngen qaýip
Reseı TJM málimetinshe, Tynyq muhıty akvatorıasynda tolqyndardyń Japonıanyń shyǵys jaǵalaýyna deıin jetýi múmkin, tolqyn bıiktigi 32 santımetrge deıin bolýy yqtımal. Elde sýnamı qaýpi jarıalanyp, poıyz qozǵalysy toqtatylǵan. Áýe arqyly monıtorıń júrgizý úshin joıǵysh ushaqtar tartylǵan. Japon bıligi jaǵalaý mańyndaǵy turǵyndardy evakýasıalaýǵa shaqyrdy.
Sýnamı týraly eskertý AQSH-tyń Aláska, Kalıfornıa, Oregon jáne Vashıngton shtattarynda da jarıalandy. Fılıppınderde de uqsas sharalar qabyldanǵan.
Aftershoktar bolýy múmkin
Mamandardyń aıtýynsha, aldaǵy bir aı ishinde óńirde magnıtýdasy 7,5-ke deıin jetetin aftershoktar bolýy yqtımal. Seısmıkalyq belsendilik biraz ýaqytqa deıin saqtalýy múmkin.