Qazaqstan Prezıdenti Qasym-Jomart Toqaev Túrkıaǵa resmı saparmen barǵan edi. Ol sapar aıasynda birneshe kompanıa basshysymen kezdesti, - dep habarlaıdy Aqshamnews.kz tilshisi.
Memleket basshysy YDA Holding basqarma tóraǵasy Hýseın Arslandy qabyldady.
Qasym-Jomart Toqaevqa YDA Holding kompanıasynyń Qazaqstanda iske asyrylyp jatqan ınvestısıalyq jobalary jóninde málimet berildi.
Atap aıtqanda, túrkıalyq holdıń Túrkistan, Astana jáne Petropavl qalalarynda kópbeıindi aýrýhanalar salý jáne paıdalaný boıynsha úsh jobany qolǵa alǵan.
Kompanıa aldaǵy ýaqytta Astanadaǵy YDA Industrial Park kópsalaly óndiris keshenin keńeıtip, sendvıch-panelder shyǵaratyn zaýyt salýdy bastaıdy.
Sonymen qatar Hýseın Arslan kompanıanyń Aqtaýda mýltımodaldi tranzıt habyn qurýǵa qatysty josparymen bólisti.
Memleket basshysy holdıńtiń Qazaqstanǵa strategıalyq turǵydan qyzyǵýshylyǵyn jáne elimizde júzege asyryp jatqan ınvestısıalyq bastamalaryn joǵary baǵalady.
Qasym-Jomart Toqaev S Sistem Lojistik kompanıasynyń basqarma tóraǵasy Hýseın Barlındi qabyldady.
Kezdesý barysynda kompanıamen logıstıka salasynda ózara tıimdi ári uzaq merzimdi seriktestik ornatý perspektıvasy talqylandy.
Memleket basshysy elimizdi Eýrazıadaǵy jetekshi tranzıttik habqa aınaldyrý úshin Orta dálizdi jan-jaqty damytý jumystary bastalǵanyn jetkizdi.
Bul rette Qasym-Jomart Toqaev S Sistem Lojistik kompanıasynyń Aqtóbe halyqaralyq áýejaıynda logıstıka ortalyǵyn qurý bastamasyna qoldaý bildirdi. Joba «Qazposhta» aksıonerlik qoǵamymen birge júzege asyrylady.
Hýseın Barlın joba aıasynda atqarylyp jatqan jumystar týraly baıandady. Sondaı-aq kompanıanyń aldaǵy ýaqytta Astana, Almaty, Shymkent jáne Aqtaý qalalarynda da logıstıka ortalyǵyn keńeı
Qasym-Jomart Toqaevtyń aıtýynsha, logıstıka ınfraqurylymyn keshendi túrde damytý óte mańyzdy. Munyń bári tranzıt ýaqytyn qysqartýǵa jáne eksport ınfraqurylymyn jaqsartýǵa múmkindik beredi.
S Sistem Lojistik – Túrkıanyń logıstıka sektoryndaǵy jetekshi ınovasıalyq uıym. Kompanıa Ystanbul, Ankara, Izmır jáne Antalá áýejaılarynda, sondaı-aq basqa da jerlerde jalpy aýmaǵy 100 myń sharshy metr qoıma jelisin basqarady.
Memleket basshysy Tiryaki Holding kompanıasynyń atqarýshy dırektory Súleımen Tırákıoǵlyny qabyldady.
Kezdesý barysynda Prezıdent Qasym-Jomart Toqaev pen Tiryaki Holding kompanıasynyń atqarýshy dırektory Súleımen Tırákıoǵly agroónerkásip kesheni baǵytyndaǵy ózara tıimdi jáne uzaqmerzimdi seriktestik máselesin talqylady.
Memleket basshysy kompanıanyń Astana qalasynan bıdaı men burshaqty tereń óńdeý zaýytyn salý týraly sheshimine qoldaý bildirdi.
Súleımen Tırákıoǵly atalǵan joba elimizdiń qaıta óńdeý ónerkásibin damytýǵa, zamanaýı tehnologıalardy engizýge jáne jergilikti mamandardyń biliktiligin arttyrýǵa yqpal etetinin aıtty.
Kezdesýde Qazaqstannyń aýyl sharýashylyǵy ónimderin tasymaldaý úshin logıstıkany tıimdi uıymdastyrý, qoıma ınfraqurylymyn sıfrlandyrý jáne elevatorlardy jańǵyrtý máseleleri qaraldy.
Tiryaki Holding dándi, maıly daqyldar, jem-shóp óndirý jáne eksporttaý boıynsha álemdegi kóshbasshy kompanıalardyń biri.
Memleket basshysy Orzax Group basqarma tóraǵasy Selman Alımoǵlyny qabyldady.
Álemdegi bıologıalyq belsendi qospalar naryǵynda kóshbasshylardyń biri sanalatyn kompanıa basshylyǵymen kezdesýde birlesken jobalardy júzege asyrý máselesi qarastyryldy.
Qasym-Jomart Toqaev Orzax Group kompanıasynyń Túrkistan oblysynda bıologıalyq belsendi qospalar óndiretin zaýyt salý sheshimine qoldaý bildirip, bul bastama otandyq farmasevtıka salasyn ártaraptandyrýǵa jáne elimizdiń eksporttyq áleýetin arttyrýǵa eleýli úles qosatynyn atap ótti.
Selman Alımoǵly kompanıanyń Qazaqstanda óndiristik bazany keńeıtýmen ǵana shektelmeı, ǵylymı-zertteý jáne ınovasıa baǵyttaryn da damytýǵa nıetti ekenin jetkizdi.
Búgingi tańda Orzax Group bıologıalyq belsendi qospalardyń 150 túrin óndirip, álemniń 60 eline eksporttaıdy. Qazaqstandaǵy óndiris jobasyna kompanıa 40 mıllıon dollar ınvestısıa quıyp, 500 adamdy turaqty jumyspen qamtýdy josparlap otyr.