Astanada QR Týrızm jáne sport mınıstrliginiń uıymdastyrýymen jyl saıynǵy «Úzdik-2024» syılyǵynyń jeńimpazdaryn marapattaý is-sharasy ótti, dep habarlaıdy aqshamnews.kz
Saltanatty jıynǵa QR Parlamentiniń depýtattary, Olımpıada jeńimpazdary men júldegerleri, álem birinshilikteri men halyqaralyq jarystardyń jeńimpazdary men júldegerleri, sport jýrnalıseri qatysty.
Týrızm jáne sport mınıstri Erbol Myrzabosynov 2024 jyl otandyq sport úshin erekshe jyl bolǵanyn atap ótti. Qazaqstandyq sportshylar bıyl halyqaralyq iri jarystarda tabysty nátıje kórsetse, elimizde iri jarystar uıymdastyryldy.
«Bıylǵy jyldyń basty dodasy Parıj Olımpıadasy men Paralımpıada bolǵany anyq. Bizdiń qurama tarıhı jetistikterge qol jetkizdi. Dzúdoshy Eldos Smetov Olımpıada chempıony atandy. Bul – Táýelsiz Qazaqstan tarıhynda dzúdodan buıyrǵan alǵashqy altyn medal. Gımnastıkadan alǵash ret Olımpıada medalin jeńip aldyq. Ol júlde Narıman Qurbanovqa buıyrdy. Davıd Degtárev para-paýerlıftıngten eki dúrkin Paralımpıada chempıony atandy. Para-dzúdoshy Aqmaral Naýatbek Olımpıada shyńyn baǵyndyrdy», – dedi mınıstr.
Sonymen qatar bıyl Astanada 5-shi Dúnıejúzilik kóshpendiler oıyny uıymdastyryldy. Kóshpendiler dodasyna 89 eldiń sportshylary qatysty. Qazaqstan quramasy jalpykomandalyq esepte top jardy.
«Memleket basshysy Qasym-Jomart Kemeluly Toqaevtyń qoldaýymen sport salasynda oń ózgerister bastaldy. Kelesi jyly otandyq sportshylardy birneshe baıraqty báseke kútip tur. 2025 jyldyń aqpan aıynda sportshylarymyz Qytaıdyń Harbın qalasynda ótetin qysqy Azıa oıyndaryna qatysyp, qysqy Olımpıada lısenzıasy úshin synǵa túsedi. Tarıh qoınaýyna enip bara jatqan 2024 jyly sportshylarymyz jaman nátıje kórsetken joq, jańa jyldan odan da úlken jeńister kútemiz», – dedi Erbol Myrzabosynov.
Jyl qorytyndysy boıynsha «Úzdik» dep tanylǵandar:
Eldos Smetov, Davıd Degtárev – «Jyldyń úzdik sportshysy»;
Ǵalymjan Jylgeldıev, Iýrıı Kolesnıkov – «Jyldyń úzdik jattyqtyrýshysy»;
Grek-rım, erkin jáne áıelder kúresi federasıasy – «Jyldyń úzdik akkredıttelgen sport federasıasy»;
Qýanyshbek Esekeev, Qazaqstan dzúdo federasıasynyń prezıdenti – «Jyldyń úzdik akkredıttelgen sport federasıasynyń prezıdenti»;
Erkebulan İlıasov, «Jamby atý federasıasy» RQB prezıdenti – «Úzdik sport mesenaty»;
Kaz Minerals - «Úzdik sport mesenaty»;
Ǵızat Túsipaev – «Jyldyń úzdik aýyl jattyqtyrýshysy»;
Erlan Tasbolatov – «Aýyldyq jerdegi úzdik dene shynyqtyrý jáne sport ádiskeri»;
Darhan Sharıǵatov – «Aýyldyq jerdegi úzdik dene shynyqtyrý jáne sport nusqaýshysy»;
Maqat aýdandyq mádenıet, tilderdi damytý, dene shynyqtyrý jáne sport bólimi – «Aýdandyq úzdik dene shynyqtyrý jáne sport bólimi»;
Almaty qalasyndaǵy «Joǵary sport sheberligi mektebi» – «Jyldyń úzdik sport uıymy»;
Jambyl oblysy ákimdiginiń dene shynyqtyrý jáne sport basqarmasy – «Úzdik sporttyq óńir»;
Ilá Mızernyh – «Jas jáne jasóspirimder quramyndaǵy sportshy»;
Sergeı Sergeev – «Jyldyń úzdik balalar jattyqtyrýshysy»;
Nadejda Kım – «Dene shynyqtyrý jáne sport salasyndaǵy úzdik maman»;
Aqmaral Naýatbek – «Sportta úzdik serpin»;
Jandos Aıtbaıuly («Habar» telearnasy), Qýanysh Nurdanbekuly («Egemen Qazaqstan» gazeti), Nazerke Sultanbek («Sport+» saıty) – Seıdahmet Berdiqulov atyndaǵy syılyqtyń laýreattary.