40 myń adamnyń ishinde 1 ret kezdesetin patologıa
Almaty qalasynyń № 7 qalalyq klınıkalyq aýrýhanasyna Túrkistan oblysynan «Presakraldy jylaýyq» (tik ishek mańyndaǵy isik) dıagnozy qoıylǵan 21 jastaǵy naýqas keldi. № 7 qalalyq klınıkalyq aýrýhananyń koloproktologıa bóliminiń meńgerýshisi Marat Qalenbaevtyń aıtýynsha, jylaýyqtyń ereksheligi onyń óte úlken kóleminde boldy – shamamen 18-den 16 sm-ge deıingi dóńgelek pishinde, kishi jambas aýmaǵynda ornalasqan. Jylaýyqtyń ósýi baıqalmaǵandyqtan, ol tabıǵı jolmen ishti bosatýǵa kedergi keltirgen, al jas qyz tik ishek mańyndaǵy turaqty qolaısyzdyqtan zardap shegip kelgen.
Kishi jambas jylaýyǵy – bul sırek kezdesetin patologıa, ol dińshek pen tik ishek arasynda ornalasqan anomaldy qýys nemese qalta. Mundaı jaǵdaı 40 myń adamnyń ishinde 1 ret kezdesedi. Ádette, jylaýyqtar MRT nemese kishi jambas aǵzalarynyń ÝDZ kezinde 2 sm shamasynda anyqtalady, al bul jaǵdaıda kólemi aıtarlyqtaı úlken boldy», – dedi tájirıbeli hırýrg-koloproktolog Marat Qalenbaev.
Hırýrgtar jylaýyqty alyp tastaý úshin kúrdeli operasıa jasady. Quıymshaq baılamyn alyp tastaýmen júrgizilgen operasıa sátti aıaqtaldy. Bir ǵana operasıa arqyly jylaýyqty tolyqtaı alyp tastap, naýqasty emdeýge múmkindik týdy. Bul operasıany joǵary bilikti hırýrg-proktologtar, anestezıolog-reanımatologtar jáne tájirıbeli operasıalyq meıirbıkelerdiń kásibı sheberligi men biliktiliginiń arqasynda sátti ótkizildi. Operasıanyń tehnıkalyq kúrdeliligine jáne tik ishek aınalasyndaǵy maı qabatynyń irińdeýge beıimdiligine qaramastan, asqynýlardyń aldyn alyndy. Aıta ketý kerek, bul operasıa mindetti áleýmettik medısınalyq saqtandyrý aıasynda jasaldy.
Qazirgi ýaqytta pasıent aýrýhanadan shyǵýǵa daıyndalýda. Dárigerler halyqty medısınalyq kómekke ýaqtyly júginýge shaqyrady, sebebi hırýrgıalyq emdeý bolmaǵan jaǵdaıda, pararektaldy talshyqtyń irińdeýi, tik ishek jylankózi, zár shyǵarý jáne defekasıa fýnksıalarynyń buzylýy sıaqty qaýipti asqynýlar paıda bolýy múmkin. Aýrýdyń uzaq ýaqyt emdelmeýi nevralgıa, nevrıt jáne anemıa sıaqty aýrýlardyń damýyna ákelýi múmkin.