Bıyl 42 erikti men volonterler uıymy jeńimpaz atandy
Halyqaralyq volonterler kúni elordada «Jyl volonteri» syılyǵynyń jeńimpazdary marapattaldy. Bul syılyq 2020 jyly Memleket basshysy Qasym-Jomart Toqaevtyń bastamasymen taǵaıyndaldy. Ol áleýmettik baǵyttaǵy jáne qoǵamdyq paıdaly mindetterdi sheshýge úles qosqan eriktilerge beriledi.
Bıyl 42 erikti men volonterler uıymy jeńimpaz atandy.
Marapattaý rásiminde AMANAT partıasynyń Atqarýshy hatshysy Asqat Oralov volonterler koronavırýspen kúres kezinde, Arystaǵy, Maqtaaraldaǵy, Áýlıekóldegi, Ekibastuzdaǵy oqıǵalar barysynda qazaqstandyqtarǵa alǵashqylardyń biri bolyp kómek kórsetkenin atap ótti.
«Volonterlerdiń qyzmeti shynaıy patrıotızmniń kórinisi sanalady. Olar – kez kelgen qıyn jaǵdaıda kómek qolyn sozatyn meıirimdi júrektiń ıeleri. Qazaqstandaǵy volonterlik qozǵalystyń belsendi jumys isteýi – kemel qoǵamnyń kelbeti», – dedi Asqat Oralov.
Aqparat jáne qoǵamdyq damý mınıstri Darhan Qydyráliniń aıtýynsha, bıyl volonterlerdi qoldaý maqsatynda 255-ten astam shaǵyn grant tabystaldy.
«Meıirimdilik pen qamqorlyq – halqymyzǵa tán qasıetter. Búginde elimizde volonterler qozǵalysy turaqty damyp keledi. Volonterlerdi yntalandyrý jáne quqyǵyn keńeıtý boıynsha sharalar qabyldandy. Volonterlik qyzmetti qoldaý standarttary ázirlendi», – dedi mınıstr.
Sóıtip, «Habar-osharsyz ketken adamdardy izdeýge belsendi qatysqany úshin» nomınasıasy boıynsha «VITA» Pavlodar qalasynyń izdeýshileri» uıymy marapatqa ıe boldy. Uıym basshysy Ekaterına Kýdrávsevanyń aıtýynsha, bul syılyqtyń maqsaty – volonterler qozǵalysyna múmkindiginshe kóp adamdy tartý.
«Uıymymyz júzden astam adamdy izdep tapty. Olardyń arasynda balalar da, eresekter de bar. Talaı adamnyń alǵysyn aldyq. Týystary men dostary rızashylyǵyn bildirdi. Qoǵamǵa paıdamyz tıse eken deımiz. Jaqsylyq jasaǵymyz keledi. Habar-osharsyz ketken adamdardy izdeýmen qatar, volonterlerimiz qaıyrymdylyq jumysymen de aınalysady», – dedi ol.
«Tótenshe jaǵdaılardy joıýǵa belsendi qatysqany úshin» nomınasıasy boıynsha Oljas Mamyr esimdi volonter marapattaldy. Onyń aıtýynsha, eriktilerdiń basym kópshiligi úshin eń mańyzdysy – ózgege kómektesý.
«Volonter bolý – alǵys alýdy nemese materıaldyq syıaqyǵa ıe bolýdy oılamaı kómek kórsetýge daıyn bolý degen sóz. Ózgeniń jan qaıǵysyna beıjaı qaraýǵa bolmaıdy. Bireýge qamqorlyq jasaı alatyn bolsań, odan tartynbaý kerek», – deıdi ol.
Saltanatty is-shara barysynda AMANAT partıasynyń Atqarýshy hatshysy Iaroslav Stepaneske, Damır Abdınge, Darhan Aıdarhanulyna, Oljas Mamyrǵa, sondaı-aq «VITA» Pavlodar qalasynyń izdeýshiler» QB jáne «Lider.kz Astana volonterleri» QB ókilderine syılyq tabystady.