Qysqy demalys qarsańynda Oqý-aǵartý mınıstrligi ata-analarǵa arnaıy úndeý jasap, balalardyń qaýipsizdigine erekshe mán berýge shaqyrdy, dep habarlaıdy Aqshamnews.kz tilshisi.
Mınıstrliktiń málimetinshe, jyl saıyn pırotehnıkadan ondaǵan bala zardap shegedi.
Bul sannyń artynda balanyń aýyr jaraqaty men aldyn alýǵa bolatyn ókinishti jaǵdaılar jatyr.
«Otshashý men petarda – oıynshyq emes! Olar – balaǵa qaýip tóndiretin jarylǵysh zattar. Qaýipsizdik erejelerin qaperde ustańyzdar», – deıdi Oqý-aǵartý mınıstrliginiń habarlamasynda.
18 jasqa tolmaǵandarǵa pırotehnıka satýǵa qatań tyıym salynady.
«Eger balaǵa petarda satyp turǵanyn kórseńiz — beı-jaı qaramańyz, bul — zańǵa qaıshy áreket. Balalarǵa otshashýdy óz betinshe jaǵýǵa múlde bolmaıdy. Tipti «zıansyz» kóringenniń ózin de tek eresekter ǵana jaǵýy tıis. Pırotehnıkany úı ishinde, balkonda jáne turǵyn úılerdiń mańynda atýǵa nemese qoldanýǵa bolmaıdy.
Balalardyń amandyǵy – sizdiń qyraǵylyǵyńyzǵa baılanysty», – dep Oqý-aǵartý mınıstrligi ata-analarǵa eskertý jasady.